കര്‍ണാടക: ഹിജാബ് ഒഴിച്ചുകൂടാനാകാത്ത മതാചാരങ്ങളുടെ പരിധിയില്‍ വരില്ലെന്ന് കര്‍ണാടക സര്‍ക്കാര്‍ ഹൈക്കോടതിയില്‍. സര്‍ക്കാര്‍ ഭരണഘടനാ ലംഘനം നടത്തിയിട്ടില്ലെന്നും അഡ്വക്കേറ്റ് ജനറല്‍ പറഞ്ഞു. വിശാല ബെഞ്ചിനെയാണ് കര്‍ണാടക സര്‍ക്കാര്‍ നിലപാട് അറിയിച്ചത്. 

ഹിജാബ് വിലക്കിനെതിരായ ഹരജിയില്‍ കര്‍ണാടക ഹൈക്കോടതിയുടെ വിശാല ബെഞ്ച് തിങ്കളാഴ്ചയും വാദം കേള്‍ക്കും. സംഘര്‍ഷങ്ങളില്ലാതിരിക്കാന്‍ ശ്രദ്ധിക്കാമെന്ന് സര്‍ക്കാര്‍ കോടതിയെ അറിയിച്ചു. 'ഹിജാബ് നിരോധനം അനവസരത്തിലായിരുന്നോ ഒരു വശത്ത് നിങ്ങള്‍ ഉന്നതതല സമിതി വിഷയം പരിശോധിക്കുന്നുവെന്ന് പറയുന്നു, മറുവശത്ത് നിങ്ങള്‍ ഈ ഉത്തരവ് പുറപ്പെടുവിക്കുന്നു. ഇത് പരസ്പര വിരുദ്ധമല്ലേ' എന്നായിരുന്നു ഇന്ന് കോടതിയുടെ ഒരു ചോദ്യം. 'തീര്‍ച്ചയായും അല്ല' എന്നായിരുന്നു എ.ജിയുടെ മറുപടി. ഹിജാബ് ഇസ്‌ലാം മതത്തിലെ ഒഴിച്ചുകൂടാനാകാത്ത ആചാരമല്ല എന്നാണ് സര്‍ക്കാര്‍ നിലപാടെന്ന് അഡ്വക്കേറ്റ് ജനറല്‍ കോടതിയില്‍ പറഞ്ഞു.