തലശ്ശേരി:  ഇന്നലെ  നഗരത്തിലെ രണ്ട് സ്ഥലങ്ങളില്‍ കെട്ടിട ഭാഗങ്ങള്‍ ഭാഗികമായി തകര്‍ന്നു വീണു. ആര്‍ക്കും പരുക്കില്ല. പുതിയ ബസ് സ്റ്റാന്‍ഡ് ടാക്‌സി സ്റ്റാന്‍ഡിന് സമീപം പാറാല്‍പള്ളി കോംപ്ലക്‌സിന്റെ സണ്‍ഷെയ്ഡ്  ഉച്ചയ്ക്ക് ഒന്നരയോടെയാണ് തകര്‍ന്നു വീണത്. താഴത്തെ നിലയില്‍ പ്രവര്‍ത്തിക്കുന്ന നാലു കടകളുടെ മുന്നിലേക്കാണ് വീണത്. ആളുകള്‍ ഓടി മാറിയതിനാല്‍ ആര്‍ക്കും പരുക്കേറ്റില്ല. ഇവിടെ നിര്‍ത്തിയിട്ടിരുന്ന രണ്ട് ബൈക്കുകള്‍ക്ക് കേടുപാടുണ്ടായി. അഗ്‌നിരക്ഷാ സേനയെത്തിയാണ് തകര്‍ന്നുവീണ കെട്ടിടഭാഗം നീക്കിയത്.  വൈകീട്ട് നാലിന് കടപ്പുറം മത്സ്യമാര്‍ക്കറ്റിന് സമീപത്തെ പഴയ കെട്ടിടത്തിന്റെ ഒരു ഭാഗം തകര്‍ന്നു വീണു. സമീപത്തെ പച്ചക്കറി കെട്ടിടത്തിന് ഭാഗികമായി കേടുപാടുണ്ടായി. കതിരൂര്‍ സ്വദേശി ടി.പി.നാസറിന്റെ ഉടമസ്ഥതയിലുള്ളതാണ് കെട്ടിടം.