വാരണാസി
ഉക്രൈൻ രക്ഷാദൗത്യത്തെ തെരഞ്ഞെടുപ്പ് പ്രചാരണത്തിന് ഉപയോഗിക്കുന്ന ബി.ജെ.പിക്കെതിരേ തുറന്നടിച്ച് ബംഗാൾ മുഖ്യമന്ത്രി മമതാ ബാനർജി. യു.പി ഏഴാംഘട്ട തെരഞ്ഞെടുപ്പുമായി ബന്ധപ്പെട്ട് എസ്.പി പ്രചാരണത്തിന് വാരണാസിയിലെത്തിയതായിരുന്നു അവർ. ഉക്രൈനിൽ ഇന്ത്യൻ വിദ്യാർഥികൾ ഭക്ഷണവും വെള്ളവുമില്ലാതെ കഷ്ടപ്പെടുമ്പോൾ, പ്രധാനമന്ത്രി നരേന്ദ്ര മോദി ഇവിടെ തെരഞ്ഞെടുപ്പ് പ്രചാരണം നയിക്കുകയാണെന്നാണ് മമത കുറ്റപ്പെടുത്തിയത്.

റഷ്യൻ പ്രസിഡന്റ് വ്ളാഡിമിർ പുടിനുമായി അടുത്ത ബന്ധമുണ്ടെന്ന് അവകാശപ്പെടുന്ന മോദിക്ക്, എന്തുകൊണ്ട് കൃത്യസമയത്ത് വിദ്യാർഥികളെ നാട്ടിൽ തിരിച്ചെത്തിക്കാൻ കഴിഞ്ഞില്ലെന്നും മമത ചോദിച്ചു. 'ഉക്രൈനിൽ കുടുങ്ങിയവരെ കേന്ദ്രമാണ് തിരിച്ചെത്തിക്കേണ്ടത്. അല്ലാതെ യുദ്ധഭീതിയിൽ കഴിയുന്നവരോട് സ്വയം രക്ഷനോക്കാൻ ആവശ്യപ്പെടുകയല്ല വേണ്ടത്', മമത കുറ്റപ്പെടുത്തി.
ഈ മാസം ഏഴിന് നടക്കുന്ന അവസാനഘട്ട തെരഞ്ഞെടുപ്പിൽ പ്രധാനമന്ത്രി മോദിയുടെ പാർലമെന്റ് മണ്ഡലമായ വാരണാസി ഉൾപ്പെടുന്ന സ്ഥലങ്ങളിലാണ് വോട്ടെടുപ്പ് നടക്കുന്നത്. വാരണാസി കന്റോൺമെന്റ്, വാരണാസി നോർത്ത്, വാരണാസി സൗത്ത് മണ്ഡലങ്ങൾ ബി.ജെ.പിക്ക് നിർണായകമാണ്. ബി.ജെ.പിക്കായി പ്രധാനമന്ത്രി മോദിയും ഈ മണ്ഡലങ്ങളിൽ ഇന്നും നാളെയും പ്രചാരണത്തിനെത്തുന്നുണ്ട്.നേരത്തെ എസ്.പി പ്രചാരണത്തിനായി വാരണാസിയിലെത്തിയ മമതയെ ഹിന്ദു യുവവാഹിനി പ്രവർത്തകർ തടഞ്ഞിരുന്നു. ഇവിടെ ദശശ്വമേധ് ഗാട്ടിൽ നടക്കുന്ന ഗംഗ ആരതിയിൽ പങ്കെടുക്കാൻ പോകുന്നതിനിടെയാണ് മമതയുടെ വാഹന വ്യൂഹത്തിനു നേരെ യുവവാഹിനി പ്രവർത്തകർ കരിങ്കൊടി കാണിച്ചത്.

'എന്നെ തടഞ്ഞതിനർഥം അവരുടെ പതനം ആസന്നമായിരിക്കുന്നു എന്നാണ്'
ലഖ്‌നൗ
എസ്.പി പ്രചാരണത്തിനായി വാരണാസിയിലെത്തിയ തന്നെ ഹിന്ദു യുവവാഹിനി പ്രവർത്തകർ തടഞ്ഞതിൽ ബി.ജെ.പിക്കെതിരേ തുറന്നടിച്ച് മമത. യു.പിയിൽ ബി.ജെ.പിയുടെ പതനം ആസന്നമായിരിക്കുന്നതിനാലാണ് തന്നെ അവർ തടഞ്ഞതെന്ന് മമത കുറ്റപ്പെടുത്തി. താൻ നിരവധി തവണ ആക്രമിക്കപ്പെട്ടിട്ടുണ്ട്, വെടിയുണ്ടകളും ലാത്തിയടികളും ഏറ്റിട്ടുണ്ട്. പക്ഷെ അപ്പോഴൊന്നും തളർന്നിട്ടില്ല, തോറ്റു പിൻമാറിയിട്ടില്ല', മമത പറഞ്ഞു. മുഖ്യമന്ത്രി യോഗി ആദിത്യനാഥാണ് രണ്ടു പതിറ്റാണ്ടു മുമ്പ് ഹിന്ദു യുവവാഹിനി സംഘത്തിന് രൂപം നൽകിയത്.