തിരുവനന്തപുരം: എല്‍.ഡി.എഫിന് ജയിച്ചു വരാന്‍ ഒരു വര്‍ഗീയ ശക്തിയുടേയും ഒത്താശ വേണ്ടെന്ന് മുഖ്യമന്ത്രി പിണറായി വിജയന്‍. ബി.ജെ.പി നേതാവ് ഒ.രാജഗോപാല്‍ കേരളത്തില്‍ കോലീബി (കോണ്‍ഗ്രസ് മുസ്‌ലിം ലീഗ് ബിജെപി) സഖ്യമുണ്ടായിരുന്നു എന്ന് പറഞ്ഞതൊന്നും മാധ്യമങ്ങള്‍ കേള്‍ക്കാത്ത മാധ്യമങ്ങള്‍ക്ക് ആര്‍. ബാലശങ്കറിന്റെ പിന്നാലെ പോകാന്‍ നാണമുണ്ടോ എന്നും അദ്ദേഹം ചോദിച്ചു.

എല്‍.ഡി.എഫില്‍ ജനങ്ങള്‍ക്ക് വലിയ പ്രതീക്ഷയുണ്ടെന്ന് അദ്ദേഹം കൂട്ടിച്ചേര്‍ത്തു. പ്രചാരണ മേഖലയില്‍ പ്രതിപക്ഷത്തിന് കടുത്ത നിരാശയാണുള്ളത്. എവിടെ വികസനം എന്ന പ്രതിപക്ഷത്തിന്റെ ചോദ്യം വ്യക്തമാക്കുന്നത് അതാണ്. എല്‍.ഡി.എഫ് സര്‍ക്കാര്‍ നടപ്പാക്കിയ വികസന പദ്ധതികള്‍ ആര്‍ക്കും മറച്ചുവെക്കാനാകില്ല. അതുകൊണ്ട് തന്നെ എല്‍.ഡി.എഫില്‍ ജനങ്ങള്‍ക്ക് വിശ്വാസവും പ്രതീക്ഷയുമുണ്ട്. കേരളം മാറില്ലെന്ന ധാരണ ഇടതുപക്ഷം തിരുത്തിയെന്നും അദ്ദേഹം പറഞ്ഞു.

ഇപ്പോള്‍ തെരെഞ്ഞെടുപ്പ് വന്നപ്പോള്‍ ശബരിമല വിഷയം വീണ്ടും കൊണ്ടു വരാന്‍ ശ്രമിക്കുകയാണ്. ഇതിന് മുന്‍പൊരു തെരഞ്ഞെടുപ്പ് നടന്നപ്പോള്‍ ശബരിമല ചര്‍ച്ചയായോ? ശബരിമല കേസ് നിലവില്‍ സുപ്രിം കോടതിയുടെ പരിഗണനയിലാണ്. ആ കേസില്‍ പുതിയ വിധി വരുമ്പോള്‍ മാത്രമേ ഇനി ശബരിമല വിഷയത്തിലൊരു ചര്‍ച്ചക്ക് പ്രസക്തിയുള്ളൂ. ശബരിമല കേസില്‍ സുപ്രിംകോടതി വിധി വന്നാല്‍ എല്ലാവരുമായി ആലോചിച്ച് സര്‍ക്കാര്‍ വിധി നടപ്പാക്കുമെന്നും മുഖ്യമന്ത്രി വ്യക്തമാക്കി.