തൊടുപുഴ : എല്ലാ പഞ്ചായത്തിലും ബൃഹത്തായ കുടിവെള്ള പദ്ധതികള്‍ നടപ്പിലാക്കിയ നിയോജക മണ്ഡലമാണ് തൊടുപുഴയെന്ന് യു.ഡി.എഫ്. സ്ഥാനാര്‍ഥി പി.ജെ.ജോസഫ് പറഞ്ഞു. പദ്ധതികള്‍ ആദ്യം നടപ്പിലാക്കിയ കുമാരമംഗലം, മുട്ടം, കരിങ്കുന്നം പഞ്ചായത്തുകളില്‍ വീണ്ടും പുതിയ പദ്ധതികള്‍ കൊണ്ടുവരേണ്ട സാഹചര്യം ഉണ്ടായതുകൊണ്ടാണ് ഈ പഞ്ചായത്തുകളില്‍ പുതുക്കിയ പദ്ധതിക്ക് താന്‍ ജലവിഭവ മന്ത്രി ആയിരിക്കെ ഭരണാനുമതി നല്‍കി ടെന്‍ഡര്‍ ചെയ്തത്. എന്നാല്‍ മുട്ടം, കരിങ്കുന്നം പദ്ധതി എല്‍.ഡി.എഫ്. സര്‍ക്കാര്‍ അധികാരമേറ്റ ശേഷം റദ്ദു ചെയ്തു. വീണ്ടും താന്‍ മറ്റൊരു പദ്ധതിക്ക് രൂപം നല്‍കുകയും അതിന് അനുമതി ലഭിക്കുകയും ചെയ്തതായി അദ്ദേഹം പറഞ്ഞു. കുമാരമംഗലം പഞ്ചായത്തിന് തൊടുപുഴ പദ്ധതിയില്‍ നിന്ന് വെള്ളം നല്‍കാനുള്ള മറ്റൊരു പദ്ധതിക്കും അനുമതി നല്‍കിയിട്ടുണ്ട്. ഇതൊടെ എല്ലാ പഞ്ചായത്തിലും ആവശ്യത്തിന് കുടിവെള്ളം എത്തും. എല്ലാ രംഗങ്ങളിലും മാതൃകയായ വികസനമാണ് തൊടുപുഴയില്‍ ഉണ്ടായിട്ടുള്ളത്. അതിന്റെ ഗുണഫലം ഇവിടെ ഉണ്ടായിട്ടുണ്ടെന്നും പി.ജെ.ജോസഫ് പറഞ്ഞു. തൊടുപുഴയില്‍ നടന്ന യു.ഡി.എഫ്. നിയോജക മണ്ഡലം നേതൃയോഗത്തില്‍ സംസാരിക്കുകയായിരുന്നു അദ്ദേഹം. റോയി കെ. പൗലോസ്, ഇബ്രാഹിംകുട്ടി കല്ലാര്‍, എം.എസ്. മുഹമ്മദ്, ബേബി ചീമ്പാറ, പി.എന്‍.സീതി, എം.ജെ.ജേക്കബ്, ജാഫര്‍ഖാന്‍ മുഹമ്മദ്, എന്‍.ഐ. ബെന്നി, ടി.വി. പാപ്പു, ഷാഹുല്‍ പള്ളത്തുപറമ്പില്‍, അഡ്വ. സിറിയക് കല്ലിടുക്കില്‍, കെ.സുരേഷ് ബാബു, അഡ്വ. ജോസഫ് ജോണ്‍, അഡ്വ. ജോസി ജേക്കബ്, റ്റി.ജി.ജി. കൈമള്‍, ജിയോ മാത്യു, എം.എം. ബഷീര്‍ എന്നിവര്‍ സംസാരിച്ചു.
വൈകിട്ട് മങ്ങാട്ടുകവലയില്‍ വോട്ടുതേടി പി.ജെ ജോസഫ് എത്തി. വ്യാപാരസ്ഥാപനങ്ങളില്‍ അടക്കം കടന്നുചെന്ന് വോട്ട് അഭ്യര്‍ഥിച്ചു. ഡി.സി.സി ജനറല്‍ സെക്രട്ടറി വി.ഇ. താജുദ്ദീന്‍, യു.ഡി.എഫ് നേതാക്കളായ പി.എച്ച് സുധീര്‍, ഷാഹുല്‍ പള്ളത്തുപറമ്പില്‍, വി.എ ഷംസുദ്ദീന്‍, പി.എ ഷാഹുല്‍ ഹമീദ്, പി.എം നിസാമുദ്ദീന്‍ തുടങ്ങിയവര്‍ അദ്ദേഹത്തോടൊപ്പമുണ്ടായിരുന്നു.