കൊച്ചി: മഞ്ചേശ്വരം തെരഞ്ഞെടുപ്പ് കോഴക്കേസില്‍ ബി.ജെ.പി സംസ്ഥാന പ്രസിഡന്റ് കെ സുരേന്ദ്രനെതിരേ ക്രൈംബ്രാഞ്ച് വ്യാജ കുറ്റപത്രമാണ് സമര്‍പ്പിച്ചതെന്നും അത് കോടതിയില്‍ തെളിയിക്കുമെന്നും പാര്‍ട്ടി ദേശീയ നേതാവും മുന്‍ കേന്ദ്രമന്ത്രിയുമായ പ്രകാശ് ജാവദേക്കര്‍. എസ്.എന്‍.സി ലാവ്‌ലിന്‍ അഴിമതിക്കേസില്‍ പ്രതിയായ മുഖ്യമന്ത്രി പിണറായി വിജയന്‍ പകപോക്കലിന്റെ രാഷ്ട്രീയമാണ് നടത്തുന്നതെന്നും അദ്ദേഹം ആരോപിച്ചു.

സംസ്ഥാന ഘടകത്തെ സുരേന്ദ്രന്‍ തുടര്‍ന്നും നയിക്കുമെന്ന് താന്‍ പ്രഖ്യാപിച്ച് നാല് ദിവസത്തിന് ശേഷമാണ് കുറ്റപത്രം വന്നതെന്നും പാര്‍ട്ടിയെ അപകീര്‍ത്തിപ്പെടുത്താന്‍ നേരത്ത പദ്ധതിയിട്ടിരുന്നുവെന്നതിന് തെളിവാണിതെന്നും ജാവദേക്കര്‍ കുറ്റപ്പെടുത്തി.

കഴിഞ്ഞ ദിവസമാണ് സുരേന്ദ്രനും മറ്റ് അഞ്ച് പാര്‍ട്ടി നേതാക്കള്‍ക്കുമെതിരേ ക്രൈംബ്രാഞ്ച് കാസര്‍കോട് സെഷന്‍സ് കോടതിയില്‍ കുറ്റപത്രം സമര്‍പ്പിച്ചത്. കഴിഞ്ഞ നിയമസഭാ തെരഞ്ഞെടുപ്പില്‍ മഞ്ചേശ്വരത്ത് സ്ഥാനാര്‍ഥിത്വം പിന്‍വലിക്കാന്‍ ബഹുജന്‍ സമാജ് പാര്‍ട്ടി (ബി.എസ്.പി) സ്ഥാനാര്‍ഥി കെ സുന്ദരയെ കൈക്കൂലി നല്‍കി ഭീഷണിപ്പെടുത്തിയെന്നാണ് കേസ്.