കൊല്ലം: അന്താരാഷ്ട്ര സൈബര്‍ സെക്യൂരിറ്റി ദിനത്തോടനുബന്ധിച്ച് കേരള പൊലിസ് സംഘടിപ്പിച്ച ദ്വിദിന അന്താരാഷ്ട്ര സൈബര്‍ സുരക്ഷാ സമ്മേളനം കൊക്കൂണ്‍ 2016' കൊല്ലം ഹോട്ടല്‍ റാവിസ് അഷ്ടമുടി റിസോര്‍ട്ടില്‍ നടന്നു. കേരള ഗവര്‍ണര്‍ പി സദാശിവം ഉദ്ഘാടനം ചെയ്തു.
എന്‍.കെ പ്രേമചന്ദ്രന്‍ എം.പി അധ്യക്ഷനായി. കാനഡയിലെ സൊസൈറ്റി ഫോര്‍ പൊലഇസിങ് ഓഫ് സൈബര്‍ സ്‌പേസ് എക്‌സിക്യുട്ടീവ് ഡയരക്ടര്‍ ബെസി പാംഗ്, സെക്രട്ടറി സ്‌കോട്ട് വാറന്‍, ജൂലി ഗോണ്‍സ് എന്നിവര്‍ പ്രഭാഷണം നടത്തി. ഡി.ജി.പി ലോക്‌നാഥ് ബഹ്‌റ, സിറ്റി പൊലിസ് കമ്മിഷനര്‍ സതീഷ് ബിനോ പ്രസംഗിച്ചു.
ഇന്നു നടക്കുന്ന സമാപന സമ്മേളനം മുഖ്യമന്ത്രി പിണറായി വിജയന്‍ ഉദ്ഘാടനം ചെയ്യും. മത്സ്യ, തുറമുഖ വകുപ്പ് മന്ത്രി ജെ. മേഴ്‌സിക്കുട്ടിയമ്മ അധ്യക്ഷയാകും. ശശി തരൂര്‍ എം.പി മുഖ്യപ്രഭാഷണം നടത്തും. പ്രധാനമന്ത്രിയുടെ ഓഫിസിലെ സൈബര്‍ സുരക്ഷാ മേധാവി ഗുല്‍ഷന്‍ റായ്, കേന്ദ്ര ഇലക്ട്രോണിക്‌സ് ആന്‍ഡ് ഇന്‍ഫര്‍മേഷന്‍ ടെക്‌നോളജി മന്ത്രാലയ സെക്രട്ടറി അരുണ സുന്ദര്‍രാജ് എന്നിവര്‍ വിശിഷ്ടാതിഥികളായിരിക്കും. ആഗോളതലത്തില്‍ സൈബര്‍ കുറ്റകൃത്യങ്ങള്‍ വര്‍ധിച്ചുവരുന്ന സാഹചര്യത്തിലാണ് സമ്മേളനം സംഘടിപ്പിച്ചിരിക്കുന്നത്. കാലികപ്രസക്തമായ വിഷയങ്ങള്‍ ചര്‍ച്ച ചെയ്യുന്ന സമ്മേളനത്തില്‍ രാജ്യാന്തര തലത്തിലുള്ള വിദഗ്ധര്‍ ഉള്‍പ്പെടെയുള്ളവര്‍ പങ്കെടുക്കും.