മൊഗ്രാല്‍പുത്തൂര്‍: കാടുമൂടിയ ഓവുചാല്‍ അപകടക്കെണിയൊരുക്കുന്നു. ചൗക്കി കമ്പാര്‍ റോഡിലാണ് ഓവുചാലുകള്‍ക്കു മുകളില്‍ കാടുകയറിയിരിക്കുന്നത്. മിക്ക സമയങ്ങളിലും ഈ ഓവുചാലുകളില്‍ വാഹനങ്ങള്‍ കുടുങ്ങുന്നതു ഡ്രൈവര്‍മാരെ വട്ടം ചുറ്റിക്കുകയാണ്.
അപകടം പതിവായിട്ടും ഓവുചാലുകള്‍ക്കു മുകളില്‍ സ്‌ളാബിടാനോ കാടുവെട്ടാനോ അധികൃതര്‍ തയാറാവുന്നില്ലെന്നാണ് പരാതിയുയരുന്നത്.
വീതി കുറഞ്ഞ റോഡിന്റെ ഇരുവശത്തും കാടുമൂടിയതോടെ കാല്‍ നടയാത്രക്കാരും ഭീതിയിലാണ്. വലിയ വാഹനങ്ങള്‍ വരുമ്പോള്‍ റോഡരികിലേക്കു നീങ്ങിയാല്‍ ഓവുചാലില്‍ വീഴുന്നതു പതിവാണ്.  
നല്ല ആഴത്തില്‍ നിര്‍മിച്ചിട്ടുള്ള ഓവു ചാലില്‍ കഴിഞ്ഞ ഒരാഴ്ചയ്ക്കിടെ നടന്നതു പതിനഞ്ചോളം അപകടങ്ങളാണ്. സ്‌കൂള്‍-മദ്‌റസ വിദ്യാര്‍ഥികള്‍ ഉള്‍പ്പെടെ നൂറുകണക്കിനു പേരാണു ദിവസേന ഈ റോഡിലൂടെ നടന്നു പോകുന്നത്.
ബസുകളടക്കമുള്ള വലിയ വാഹനങ്ങള്‍ കടന്നുപോകുമ്പോള്‍ കാല്‍നടയാത്രക്കാര്‍ ബുദ്ധിമുട്ടുകയാണ്.
ചെറുറോഡായതിനാലും ഓവുചാലുള്ളതിനാലും അപകടം നടന്നാല്‍ മണിക്കൂറുകളോളം ഗതാഗത കുരുക്കും ഇവിടെ പതിവാണ്.