ന്യൂഡല്‍ഹി: പൗരത്വ നിയമ ഭേദഗതി ചോദ്യം ചെയ്തുകൊണ്ട് സമസ്ത ഉള്‍പ്പടെ നല്‍കിയ സ്റ്റേ ആപ്ലിക്കേഷനുകള്‍ക്ക് മറുപടി നല്‍കാന്‍ കേന്ദ്രത്തിന് മൂന്നാഴ്ചത്തെ സമയം നല്‍കി സുപ്രിംകോടതി. ഹരജികള്‍ ഏപ്രില്‍ ഒന്‍പതിന് വീണ്ടും പരിഗണിക്കും. 

മുസ്‌ലിം ലീഗ്, ഡി.വൈ.എഫ്.ഐ, സോളിഡാരിറ്റി യൂത്ത് മൂവ്‌മെന്റ്, കേരള സര്‍ക്കാറിന്റേതടക്കം 250ലധികം ഹരജികളാണ് കോടതിയുടെ പരിഗണനയ്‌ക്കെത്തിയത്.പൗരത്വ ഭേദഗതി നിയമം, 2019ഉം പുതിയതായി നോട്ടിഫൈ ചെയ്ത പൗരത്വ ഭേദഗതി ചട്ടങ്ങള്‍, 2024ഉം സ്റ്റേ ചെയ്യണമെന്നാവശ്യപ്പെട്ട് കൊണ്ടാണ് സമസ്ത സ്‌റ്റേ ആപ്ലിക്കേഷന്‍ സമര്‍പ്പിച്ചത്. 

സി.എ.എയെ ചോദ്യംചെയ്തുകൊണ്ട് 237 ഹരജികളും 20 സ്റ്റേ അപേക്ഷകളുമാണ് സുപ്രിംകോടതിയുടെ പരിഗണനയിലുണ്ടായിരുന്നത്. ചീഫ് ജസ്റ്റിസ് ഡി.വൈ. ചന്ദ്രചൂഡ്, ജസ്റ്റിസുമാരായ ജെ.ബി. പര്‍ദിവാല, മനോജ് മിശ്ര എന്നിവരടങ്ങിയ ബെഞ്ചാണ് ഹരജി പരിഗണിച്ചത്. 

പൗരത്വ ഭേദഗതി നിയമം നടപ്പാക്കില്ലെന്നായിരുന്നു കേന്ദ്ര സര്‍ക്കാര്‍ സുപ്രിംകോടതിയില്‍ നല്‍കിയ ഉറപ്പ്. ഈ ഉറപ്പിന് വിരുദ്ധമാണ് കേന്ദ്ര സര്‍ക്കാരിന്റെ വിജ്ഞാപനം. ഭരണഘടന ഉറപ്പുനല്‍കുന്ന തുല്യതയ്ക്ക് വിരുദ്ധമാണ് പൗരത്വ നിയമമെന്നും ഹരജിക്കാര്‍ വാദിക്കുന്നു. ഒരു മതത്തെ മാത്രം മാറ്റി നിര്‍ത്തി പൗരത്വം നല്‍കുന്നത് പ്രഥമ ദൃഷ്ട്യാ ഭരണഘടനാ വിരുദ്ധമാണെന്നും ഹരജിക്കാര്‍ പറയുന്നു.

ലോക്‌സഭ തെരഞ്ഞെടുപ്പ് പ്രചാരണ വിഷയത്തില്‍ ആദ്യഘട്ടത്തില്‍ മുന്‍പന്തിയില്‍ ഇടംപിടിച്ചത് പൗരത്വ നിയമ ഭേദഗതിയാണ്. സി.എ.എ കേരളത്തില്‍ നടപ്പാക്കില്ലെന്നാണ് സര്‍ക്കാര്‍ ആവര്‍ത്തിക്കുന്ന വാഗ്ദാനം. കേന്ദ്രത്തില്‍ അധികാരത്തില്‍ വന്നാല്‍ സി.എ.എ നിയമമെടുത്തുകളയുമെന്ന വാഗ്ദാനമാണ് ജനങ്ങള്‍ക്ക് യു.ഡി.എഫ് നല്‍കുന്നത്. മൗനം പാലിക്കുകയല്ലാതെ മറ്റു മാര്‍ഗങ്ങള്‍ ഇല്ലാതെയാണ് ബി.ജെ.പിയുടെ പ്രചരണം.