ചേളാരി: അസോസിയേഷന്‍ ഓഫ് സമസ്ത മൈനോറിറ്റി ഇന്‍സ്റ്റിറ്റിയൂഷന്‍സ് (അസ്മി) പ്രതിഭാധനരായ വിദ്യാര്‍ത്ഥികളെ കണ്ടെത്തുന്നതിനുള്ള ലിറ്റില്‍ സ്‌കോളര്‍ ടാലന്റ് സെര്‍ച്ച് സോണല്‍ എക്‌സാം 28.01.2023 ന് ആറ് സെന്ററുകളില്‍ നടക്കും. രാവിലെ 9.30 ന് രജിസ്‌ട്രേഷന്‍ ആരംഭിക്കും. 10 മുതല്‍ ഉച്ചയ്ക്ക് 1 മണി വരെയാണ് പരീക്ഷ.

കണ്ണൂര്‍: അല്‍ നൂര്‍ ഇസ്ലാമിക് സ്‌കൂള്‍ അരട്ടക്കപ്പള്ളി, കോഴിക്കോട്: സി.എം മഖാം ഇസ്ലാമിക് പ്രീ സ്‌കൂള്‍ മടവൂര്‍, കൊണ്ടോട്ടി: ഇസ്ലാമിക് സെന്റര്‍ ആക്കോട്, മലപ്പുറം: സബാന്‍ പ്രീ സ്‌കൂള്‍ കിടങ്ങഴി മഞ്ചേരി, വളാഞ്ചേരി: ഖിദ്മത് സ്‌കൂള്‍ എടക്കുളം, വെളിമുക്ക്: ക്രസന്റ് റസിഡന്‍ഷ്യല്‍ ഹയര്‍ സെക്കന്‍ഡറി സ്‌കൂള്‍ എന്നിവയാണ് സെന്ററുകള്‍.

എല്ലാ സെന്ററുകളിലുമായി 758 വിദ്യാര്‍ത്ഥികളാണ് സോണല്‍ ലെവല്‍ പരീക്ഷയില്‍ പങ്കെടുക്കുന്നത്. തിയറി, പ്രാക്ടിക്കല്‍ എന്നീ രണ്ട് മേഖലകളെ അടിസ്ഥാനമാക്കിയാണ് പരീക്ഷ നടക്കുക. പാഠ പുസ്തകങ്ങള്‍, വൗകിഡ്‌സ് മാഗസിന്‍, പൊതു വിജ്ഞാനം, മാനസിക ശേഷി എന്നിവ തിയറി പരീക്ഷയിലും ഏകാഗ്രത, കാഴ്ചപ്പാട്, ലീഡര്‍ഷിപ്പ് സ്‌കില്‍, സര്‍ഗാത്മക കലാ ശേഷികള്‍ എന്നിവ പ്രാക്ടിക്കല്‍ പരീക്ഷയിലും പരിശോധിക്കും.

സ്‌കൂള്‍ തല പരീക്ഷയില്‍ പങ്കെടുത്ത 7500 വിദ്യാര്‍ത്ഥികളില്‍ നിന്ന് ഏറ്റവും കൂടുതല്‍ മാര്‍ക്ക് നേടിയ 10 ശതമാനം വിദ്യാര്‍ഥികളെയാണ് സോണല്‍ ലെവല്‍ പരീക്ഷയിലേക്ക് തെരഞ്ഞെടുത്തത്. പ്രീ പ്രൈമറി വിഭാഗം പരീക്ഷ സോണല്‍ തലത്തില്‍ അവസാനിക്കുന്നതാണ്. പ്രൈമറി വിഭാഗം പരീക്ഷയില്‍ ഏറ്റവും കൂടുതല്‍ മാര്‍ക്ക് നേടിയ ഇരുപത് പേര്‍ക്ക് ഫെബ്രുവരി 11 ന് തിരൂര്‍ നൂര്‍ലൈക്കില്‍ വച്ച് ഗ്രാന്റ് ഫിനാലെ മല്‍സരം നടത്തും. ഗ്രാന്റ് ഫിനാലെ മല്‍സരത്തില്‍ ഉന്നത വിജയം നേടുന്നവരെ പ്രത്യേക പരിശീലനങ്ങളും മാര്‍ഗ്ഗ നിര്‍ദ്ദേശങ്ങളും നല്‍കി ഉന്നത മേഖലകളിലേക്ക് അസ്മി അവരെ കൈപ്പിടിച്ചുയര്‍ത്തും.