പാലക്കാട്: മണ്ണാര്‍ക്കാട് കോഴിക്കൂട്ടിനുള്ളില്‍ കുടുങ്ങിയ പുലി ചത്തു. കുന്തിപ്പാടം ഫിലിപ്പിന്റെ വീട്ടിലെ കോഴിക്കൂട്ടിലാണ് പുലി കുടുങ്ങിയത്. കോഴിക്കൂട്ടിലെ വലയില്‍ പുലിയുടെ കാല്‍ കുടുങ്ങുകയായിരുന്നു. ഇന്നു പുലര്‍ച്ചെ 1.30ന് കോഴികളുടെ ബഹളം കേട്ട് പുറത്തിറങ്ങി നോക്കിയപ്പോഴാണ് പുലിയെ കൂട്ടില്‍ കണ്ടത്

കോഴിക്കൂട്ടിലെ ഇരുമ്പഴിക്കുള്ളില്‍ കുടുങ്ങി പുലിയുടെ ഒരു കാലിന് പരുക്കേറ്റിരുന്നു. പുലിയെ മയക്കുവെടിവച്ച് പിടികൂടാനുള്ള നീക്കങ്ങള്‍ തുടങ്ങുന്നതിനിടെയാണ് പുലി ചത്തത്. സംഭവമറിഞ്ഞ് പൊലീസും വനംവകുപ്പ് ഉദ്യോഗസ്ഥരും സ്ഥലത്തെത്തിയിരുന്നു.

മയക്കുവെടിവെക്കുന്നതിനായി വയനാട്ടില്‍ നിന്നും ചീഫ് വൈല്‍ഡ് ലൈഫ് സര്‍ജന്‍ അരുണ്‍ സക്കറിയയുടെ സംഘം പാലക്കാട്ടേക്ക് പുറപ്പെട്ടിരുന്നു. ഒമ്പത് മണിയോടെ സംഘം സംഭവസ്ഥലത്തെത്തുമെന്നാണ് പറഞ്ഞിരുന്നത്. പുലിയെ മാറ്റുന്നതിനായി കൂട് തയ്യാറാക്കിയിട്ടുണ്ട്.

നേരത്തെ പ്രദേശത്തെ ജനവാസ മേഖയില്‍ പുലിയേയും രണ്ട് കുഞ്ഞുങ്ങളേയും കണ്ടിരുന്നതായി കാറില്‍ യാത്ര ചെയ്തിരുന്ന യുവാക്കള്‍ വ്യക്തമാക്കിയിരുന്നു. കൂടാതെ ഒരു മാസം മുമ്പ് പ്രദേശത്തെ വളര്‍ത്തു നായയെ പുലി കൊന്നിരുന്നു.