സാന്‍ജോസ്
അവസാന മത്സരത്തില്‍ കോസ്റ്ററിക്കയോട് പരാജയപ്പെട്ടിട്ടും കോണ്‍കകാഫ് മേഖലയില്‍നിന്ന് (നോര്‍ത്ത് ആന്‍ഡ് സെന്‍ട്രല്‍ അമേരിക്ക) ഖത്തര്‍ ഫുട്‌ബോള്‍ ലോകകപ്പിന് യോഗ്യത നേടി യു.എസ്.എ. ആവേശകരമായ മത്സരത്തില്‍ ഏകപക്ഷീയമായ രണ്ടു ഗോളുകള്‍ക്കാണ് യു.എസ്.എ കോസ്റ്ററിക്കയോട് പരാജയപ്പെട്ടത്. ഇന്നലെ നടന്ന മറ്റൊരു മത്സരത്തില്‍ എല്‍ സാല്‍വദോറിനെ എതിരില്ലാത്ത രണ്ട് ഗോളുകള്‍ക്ക് പരാജയപ്പെടുത്തിയ മെക്‌സിക്കോയും യോഗ്യത ഉറപ്പിച്ചു.
കോണ്‍കകാഫ് മേഖലയില്‍നിന്ന് 28 പോയിന്റുമായി കാനഡ നേരത്തേതന്നെ യോഗ്യത ഉറപ്പാക്കിയിരുന്നു. യോഗ്യതാ റൗണ്ടില്‍ ഒന്നാം സ്ഥാനക്കാരായാണ് കാനഡ ഖത്തറിലേക്കെത്തുന്നത്. മെക്‌സിക്കോയ്ക്കും 28 പോയിന്റുണ്ടെങ്കിലും ഗോള്‍ ശരാശരിയിലാണ് കാനഡ മുന്നിലെത്തിയത്.
ഇന്ന് യു.എസ്.എയെ കുറഞ്ഞത് ആറ് ഗോളുകള്‍ക്കെങ്കിലും പരാജയപ്പെടുത്തിയാല്‍ മാത്രം ലോകകപ്പ് യോഗ്യത ഉറപ്പുള്ള കോസ്റ്ററിക്കയുടെ ഗോള്‍നേട്ടം രണ്ടായത് അവര്‍ക്ക് പുറത്തേക്കുള്ള വഴി കാണിച്ചു. പോയിന്റ് പട്ടികയില്‍ യു.എസ്.എയ്ക്കും കോസ്റ്ററിക്കയ്ക്കും 25 പോയിന്റ് വീതമുണ്ടെങ്കിലും ഗോള്‍ ശരാശരിയുടെ മികവിലാണ് യു.എസ്.എ യോഗ്യത ഉറപ്പാക്കിയത്. ഇനി കോസ്റ്ററിക്കയ്ക്ക് ലോകകപ്പ് യോഗ്യത ഉറപ്പാക്കാന്‍ പ്ലേഓഫ് കളിക്കണം. പ്ലേഓഫില്‍ ന്യൂസിലന്‍ഡാണ് അവരുടെ എതിരാളികള്‍.