തിരുവനന്തപുരം
സഹകരണ സർവിസ് പരീക്ഷാ ബോർഡ് മാർച്ച് 27നു നടത്തിയ ജൂനിയർ ക്ലർക്ക് പരീക്ഷയുടെ ചോദ്യപേപ്പർ ചോർന്നതായി ഉദ്യോഗാർഥികളുടെ പരാതി.
പരീക്ഷാ സമയത്ത് സ്വകാര്യ യൂ ട്യൂബ് ചാനൽ പ്രവർത്തകന് ചോദ്യപേപ്പർ ലഭിച്ചുവെന്നാണ് പരാതി.
ഉദ്യോഗാർഥികളുടെ പരാതിയെ തുടർന്ന് ബോർഡ് സെക്രട്ടറി ഡി.ജി.പിക്ക് പരാതി നൽകി.
സംസ്ഥാനത്തെ 93 കേന്ദ്രങ്ങളിലാണ് പരീക്ഷ നടന്നത്.
പരീക്ഷ നടക്കുമ്പോൾതന്നെ യൂ ട്യൂബ് ചാനൽ പ്രവർത്തകന്റെ കൈയിൽ ചോദ്യം എത്തിയിട്ടുണ്ടെന്ന് ഉദ്യോഗാർഥികൾ ആരോപിക്കുന്നു.
കംപ്യൂട്ടറിന്റെ സ്‌ക്രീൻ സഹിതം അപ്‌ലോഡ് ചെയ്തിരിക്കുന്ന വിഡിയോയിൽ സ്‌ക്രീനിലെ സമയം 3.30 ആണ് കാണിക്കുന്നതെന്ന് ഉദ്യോഗാർഥികൾ ചൂണ്ടിക്കാട്ടുന്നു.
പരീക്ഷ എഴുതിയ ഉദ്യോഗാർഥിയുടെ കൈയിൽനിന്നു ചോദ്യം വാങ്ങി ഉത്തരം കണ്ടുപിടിച്ച് ചാനലിൽ അപ്‌ലോഡ് ചെയ്തു എന്നാണ് കരുതുന്നതെന്നും പൊലിസ് അന്വേഷണത്തിൽ കൂടുതൽ കാര്യങ്ങൾ വ്യക്തമാകുമെന്നും അധികൃതർ അറിയിച്ചു.