കോട്ടയം: 2023 ലെ സി.ജെ മാടപ്പാട്ട് മെമ്മോറിയല്‍ ബൈബിള്‍സാഹിത്യ അവാര്‍ഡിന് പാപ്പച്ചന്‍ കടമക്കുടിയുടെ
'എസ്‌തേര്‍ രാജ്ഞി' എന്ന നോവല്‍ അര്‍ഹമായി. പതിനായിരം രൂപയും പ്രശസ്തി പത്രവുമടങ്ങുന്ന പുരസ്‌കാരം
പാലാ ബിഷപ്‌സ് ഹൗസില്‍ ചേര്‍ന്ന സമ്മേളനത്തില്‍ പാലാ രൂപതാധ്യക്ഷന്‍ മാര്‍ ജോസഫ് കല്ലറങ്ങാട്ട് സമ്മാനിച്ചു.
കവി സിറിയക്ക് ജോസഫ് മാടപ്പാട്ടിന്റെ പേരില്‍ 1999 മുതല്‍ നല്‍കിവരുന്ന അവാര്‍ഡാണിത്.

മലയാളത്തിലെ വിവിധ സാഹിത്യമേഖലകളില്‍ നിന്നും ബൈബിളിനെ ആധാരമാക്കി രചിച്ച കൃതികളില്‍ നിന്നും തിരഞ്ഞെടുക്കപ്പെടുന്ന രചനയ്ക്കാണ് അവാര്‍ഡ് നല്കിപ്പോരുന്നത്.
ഇരുപതിലേറെ കൃതികളില്‍ നിന്നാണ് നോവല്‍ പുരസ്‌കാരത്തിനര്‍ഹമായത്. എറണാകുളം കടമക്കുടി സ്വദേശിയും റിട്ടയേര്‍ഡ് പ്രധാനാധ്യാപകനുമാണ് പാപ്പച്ചന്‍ കടമക്കുടി. ഗാനരചയിതാവ്, കവി എന്നീ നിലകളില്‍ ശ്രദ്ധേയനായ പാപ്പച്ചന്‍ കടമക്കുടി ഇപ്പോള്‍ മലപ്പുറം ജില്ലയിലെ മഞ്ചേരിയില്‍ താമസിക്കുന്നു.