തിരുവനന്തപുരം: കോട്ടയത്തെ കെആര്‍ നാരായണന്‍ ഫിലിം ഇന്‍സ്റ്റിറ്റ്യൂട്ടിന്റെ പുതിയ ചെയര്‍മാനായി സയ്യിദ് അഖ്തര്‍ മിര്‍സ ചുമതലയേല്‍ക്കും. അടൂര്‍ ഗോപാലകൃഷ്ണന്‍ രാജിവച്ച ഒഴിവിലേക്കാണ് നിയമനം. മുന്‍പ് പുണെ ഫിലിം ഇന്‍സ്റ്റിറ്റ്യൂട്ട് ചെയര്‍മാനായിരുന്നു ഇദ്ദേഹം. രണ്ട് തവണ ദേശീയ പുരസ്‌കാരം നേടിയിട്ടുണ്ട്. ഇന്ന് തന്നെ കോട്ടയത്ത് എത്തി വിദ്യാര്‍ത്ഥികളുമായും അധ്യാപകരുമായും കൂടിക്കാഴ്ച നടത്തുമെന്നും പ്രശ്‌നങ്ങള്‍ക്ക് കൂട്ടായി പരിഹാരം കാണുമെന്നും അദ്ദേഹം അറിയിച്ചു.

ഫിലിം ഇന്‍സ്റ്റിറ്റ്യൂട്ടുമായി ബന്ധപ്പെട്ട വിവാദങ്ങള്‍ക്ക് പിന്നാലെയായിരുന്നു അടൂര്‍ ഗോപാലകൃഷ്ണന്റെ രാജി. ഫിലിം ഇന്‍സ്റ്റിറ്റ്യൂട്ടിന്റെ ഡയറക്ടറായിരുന്ന ശങ്കര്‍ മോഹനെ പിന്തുണച്ചും വിവാദങ്ങളില്‍ പ്രതിഷേധിച്ചുമായിരുന്നു അടൂരിന്റെ രാജി. മുഖ്യമന്ത്രിയെ നേരില്‍ കണ്ട് രാജിക്കത്ത് കൈമാറുകയായിരുന്നു.