തൃപ്രയാര്‍: ബൈക്ക്,സ്‌കൂട്ടര്‍ മോഷണ സംഘാംഗമായ യുവാവിനെ തൃപ്രയാറില്‍ നിന്ന് വലപ്പാട് പൊലിസ് അറസ്റ്റു ചെയ്തു. പഴുവില്‍ സ്വദേശി കറപ്പംവീട്ടില്‍ നിഹാര്‍ (30)നെയാണ് വലപ്പാട് എസ്.ഐ പി.ജി മധുവും സംഘവും അറസ്റ്റ് ചെയ്തത്.
ഇന്നലെ പുലര്‍ച്ചെ മൂന്നരയോടെ പട്രോളിങ്ങിനിടെ തൃപ്രയാര്‍ സെന്ററില്‍ സംശയാസ്പദമായ സാഹചര്യത്തില്‍ ബൈക്കുമായി കണ്ടതിനെത്തുടര്‍ന്ന് ഇയാളെ പൊലിസ് പിടികൂടുകയായിരുന്നു.
 ചോദ്യം ചെയ്യലില്‍ ചേര്‍പ്പില്‍ നിന്ന് മോഷ്ടിച്ച ബൈക്കാണിതെന്ന് നിഹാര്‍ സമ്മതിച്ചു. തുടര്‍ന്ന് നടത്തിയ അന്വേഷണത്തില്‍ മോഷ്ടിച്ച മറ്റൊരു ബൈക്കും സ്‌കൂട്ടറും പൊലിസ് കണ്ടെടുത്തു.
ഒന്നരമാസം മുന്‍പ് പാവറട്ടി പൊലിസ് സ്റ്റേഷന് മുന്‍പില്‍ നിന്ന് നിഹാര്‍ ബൈക്ക് മോഷ്ടിച്ചിരുന്നു. സ്റ്റേഷനിലേക്ക് വന്ന പരാതിക്കാരന്‍ താക്കോലെടുക്കാതെയാണ് ബൈക്ക് പുറത്ത് വച്ചത്.
ഈ തക്കം നോക്കി നിഹാര്‍ ബൈക്കുമായി രക്ഷപ്പെടുകയായിരുന്നു. പുതുക്കാട് പള്ളിക്ക് സമീപത്തു നിന്ന് ഇയാള്‍ മോഷ്ടിച്ച സ്‌കൂട്ടറും പൊലിസ് കണ്ടെത്തി.
നിഹാറിനെ കൂടാതെ രണ്ടുപേര്‍ കൂടി സംഘത്തില്‍ ഉണ്ടെന്നും ഇവര്‍ക്കായി അന്വേഷണം ആരംഭിച്ചതായും വലപ്പാട് എസ്.ഐ പറഞ്ഞു.