ലഖ്‌നൗ: ഹത്രാസില്‍ 19 വയസുകാരിയായ ദലിത് പെണ്‍കുട്ടിയെ കൂട്ടബലാത്സംഗത്തിനിരയാക്കിയ കേസില്‍ മൂന്ന് പ്രതികളെ വെറുതെ വിട്ടു. ഉത്തര്‍പ്രദേശിലെ പ്രത്യേക കോടതിയുടേതാണ് നടപടി. കേസില്‍ പ്രതിചേര്‍ക്കപ്പെട്ട രവി,ലവ് കുശ്, രാമു എന്നിവരെയാണ് വെറുതേ വിട്ടത്. അതേസമയം ഇവരോടൊപ്പം പ്രതിചേര്‍ക്കപ്പെട്ട സന്ദീപിനെ കുറ്റക്കാരനാണെന്ന് കണ്ടെത്തി.

എന്നാല്‍ കോടതി വിധിയില്‍ യുവതിയുടെ കുടുംബം അതൃപ്തി രേഖപ്പെടുത്തി. കുറ്റവിമുക്തരാക്കപ്പെട്ട മൂന്ന് പേര്‍ക്കും സംഭവത്തില്‍ പങ്കുണ്ടെന്ന് കുടുംബം ആരോപിച്ചു. വിധിയില്‍ വിശ്വാസമില്ലെന്നും പ്രത്യേക കോടതി വിധിക്കെതിരേ ഹൈക്കോടതി അപ്പീല്‍ നല്‍കുമെന്നും കുടുംബം അറിയിച്ചു.

2020 സെപ്റ്റംബറില്‍ പടിഞ്ഞാറന്‍ ഉത്തര്‍പ്രദേശിലെ ഹത്രാസ് ജില്ലയിലെ ബൂല്‍ഗര്‍ഹിയിലാണ് 19 കാരിയായ ദളിത് യുവതി കൂട്ടബലാത്സംഗത്തിനും ക്രൂരമായ ആക്രമണങ്ങള്‍ക്കും ഇരയായത്. അതേ ഗ്രാമത്തിലെ നാല് ഉയര്‍ന്ന ജാതിക്കാരായ താക്കൂര്‍മാരാണ് കേസിലെ പ്രതികള്‍. പിന്നീട് ഡല്‍ഹിയിലെ സഫ്ദര്‍ജംഗ് ആശുപത്രിയില്‍ ചികിത്സയിലിരിക്കെ 15 ദിവസത്തിന് ശേഷമാണ് പെണ്‍കുട്ടി മരണത്തിന് കീഴടങ്ങിയത്. പെണ്‍കുട്ടിയുടെ മൃതദേഹം ബന്ധുക്കളുടെ അനുമതി ഇല്ലാതെ കത്തിച്ച നടപടിയും വിവാദമായിരുന്നു.