ജലീല്‍ അരൂക്കുറ്റി

ആലപ്പുഴ: എന്‍.ഡി.എയിലെ രണ്ടാമത്തെ കക്ഷിയായ ബി.ഡി.ജെ.എസിന് തദ്ദേശ തെരഞ്ഞെടുപ്പിലെ കനത്ത തോല്‍വിക്കു പിന്നാലെ നിയമസഭാ തെരഞ്ഞെടുപ്പിലും വന്‍തിരിച്ചടി.

എന്‍.ഡി.എയുടെ ഭാഗമായി 19 സീറ്റില്‍ മത്സരിച്ച ബി.ഡി.ജെ.എസിന് 2016 ലെ ഫലവുമായി താരതമ്യം ചെയ്യുമ്പോള്‍ വലിയ തോതില്‍ വോട്ട് കുറഞ്ഞു.

ബി.ജെ.പി കാലുവാരിയെന്ന് ആരോപിച്ച് ബി.ഡി.ജെ.എസ് സ്ഥാനാര്‍ഥികളും നേതാക്കളും രംഗത്തെത്തി. ഈഴവ വിഭാഗത്തിന്റെ വോട്ടുകള്‍ എന്‍.ഡി.എ യ്ക്ക് നേടിക്കൊടുക്കുന്നതില്‍ ബി.ഡി.ജെ.എസും പരാജയപ്പെട്ടെന്ന ആരോപണം ബി.ജെ.പിയും ഉയര്‍ത്തിയതോടെ എന്‍.ഡി.എയില്‍ ഭിന്നത രൂക്ഷമായി. 

കനത്ത തോല്‍വിയെ തുടര്‍ന്ന് ബി.ഡി.ജെ.എസ് അധ്യക്ഷന്‍ തുഷാര്‍ വെള്ളാപ്പള്ളി എന്‍.ഡി.എ സംസ്ഥാന കണ്‍വീനര്‍ സ്ഥാനം ഒഴിയാനുള്ള സന്നദ്ധത ബി.ജെ.പി കേന്ദ്ര നേതാക്കളെ അറിയിച്ചു.

2016 ല്‍ 37 സീറ്റില്‍ മത്സരിച്ച ബി.ഡി. ജെ.എസിന് ഇത്തവണ 15000 ത്തിന് മുകളില്‍ വോട്ടുനേടാന്‍ കഴിഞ്ഞത് അരൂരും ചാലക്കുടിയിലും മാത്രമാണ്. കഴിഞ്ഞ തവണത്തേക്കാള്‍ വോട്ട് കുറയുകയും ചെയ്തു. 

ബി.ജെ.പി ഒമ്പത് മണ്ഡലങ്ങളില്‍ രണ്ടാം സ്ഥാനത്ത് എത്തിയപ്പോള്‍ ബി.ഡി.ജെ. എസിന് 10 സീറ്റുകളില്‍ പതിനായിരത്തില്‍ താഴെ മാത്രമാണ് വോട്ടുലഭിച്ചത്. ഇതില്‍ കോതമംഗലം, പൂഞ്ഞാര്‍, , വാമനപുരം മണ്ഡലങ്ങളില്‍ അയ്യായിരത്തില്‍ താഴെ വോട്ടാണ് നേടാന്‍ കഴിഞ്ഞത്. പൂഞ്ഞാറില്‍ ബി.ജെ.പി , പി.സി ജോര്‍ജിനെ സഹായിച്ചപ്പോള്‍ ബി.ഡി.ജെ.എസ് സ്ഥാനാര്‍ഥിയുടെ വോട്ട് 2,928 ആയി ചുരുങ്ങി. 

2016ല്‍ 33,044 വോട്ട് നേടിയ കുട്ടനാട്ടില്‍ 14,946, 27753 വോട്ട് നേടിയ അരൂരില്‍ 17,479, 20,000 വോട്ട് നേടിയ കായംകുളത്ത് 11,413 , 19614 വോട്ട് നേടിയ ചേര്‍ത്തലയില്‍ സി.പി.എമ്മില്‍ നിന്നെത്തിയ നേതാവിനെ മത്സരിപ്പിച്ചിട്ടും 14,562 വോട്ട് മാത്രമാണ് ലഭിച്ചത്. 

20,000 ത്തിന് മുകളില്‍ വോട്ട് നേടിയ കുണ്ടറയില്‍ ഇത്തവണ 6,097 വോട്ട് മാത്രമാണ് ലഭിച്ചത്. തദ്ദേശ തെരഞ്ഞെടുപ്പിലാകട്ടെ ബി.ഡി.ജെ.എസിന് ഒരു പഞ്ചായത്ത് സീറ്റില്‍ മാത്രമാണ് ജയിക്കാന്‍ കഴിഞ്ഞത്.