രാത്രിയാത്രകള്‍ സുഗമമാക്കാന്‍ മാര്‍ഗനിര്‍ദേശവുമായി റെയില്‍വേ. രാത്രി 10 മണിക്ക് ശേഷം നിരവധി നിയമങ്ങള്‍ പാലിക്കേണ്ടതുണ്ട്. രാത്രി 10നുശേഷം യാത്രക്കാര്‍ ഉച്ചത്തില്‍ സംസാരിക്കാനോ, പാട്ട് കേള്‍ക്കാനോ, അനാവശ്യമായി ലൈറ്റുകള്‍ തെളിയിക്കാനോ പാടില്ല.

അതത് കോച്ചുകളിലോ സീറ്റ്കളിലോ കമ്പാര്‍ട്ട്‌മെന്റുകളിലോ ഉള്ള യാത്രക്കാര്‍ ഇയര്‍ഫോണുകള്‍ ഉപയോഗിച്ച് മാത്രമേ മൊബൈല്‍ ഫോണ്‍ ഉപയോഗിക്കാന്‍ പാടുള്ളൂ. ട്രെയിനുകളില്‍ പൊതു മര്യാദ പാലിക്കണം. പുകവലി, മദ്യപാനം, യാത്രക്കാരുടെ സ്വീകാര്യതക്കെതിരായ പ്രവര്‍ത്തനങ്ങള്‍ എന്നിവ യാത്രയില്‍ അനുവദനീയമല്ലെന്നും റെയില്‍വേ നിയമത്തില്‍ പറയുന്നു.

കൂടാതെ പ്രശ്‌നങ്ങള്‍ സൃഷ്ടിക്കുന്ന യാത്രക്കാരെ കണ്ടെത്താന്‍ ഓണ്‍ ബോര്‍ഡ് ടിടിഇ, കാറ്ററിംഗ് തൊഴിലാളികള്‍, റെയില്‍വേയിലെ മറ്റു ഉദ്യോഗസ്ഥര്‍ എന്നിവരെയും ചുമതലപ്പെടുത്തിയിട്ടുണ്ട്. രാത്രി യാത്രക്കാര്‍ക്കായുള്ള റെയില്‍വേയുടെ നിയമങ്ങള്‍:

1. രാത്രി 10 മണിക്ക് ശേഷം ടിക്കറ്റ് പരിശോധിക്കാന്‍ ടിടിഇക്ക് വരാന്‍ കഴിയില്ല.
2. രാത്രിയില്‍ തെളിച്ചിരിക്കുന്ന ലൈറ്റുകള്‍ ഒഴികെ മറ്റു ലൈറ്റുകള്‍ അണക്കണം.രാത്രി 10 മണിക്ക് ശേഷം ആവശ്യമില്ലാതെ ലൈറ്റുകൾ ഓൺ ആക്കാൻ പാടില്ല
3. കൂട്ടമായി യാത്ര ചെയ്യുന്നവര്‍ക്ക് രാത്രി 10മണിക്ക് ശേഷം ആശയവിനിമയം നടത്താന്‍ കഴിയില്ല.
4. മിഡില്‍ ബെര്‍ത്ത് യാത്രക്കാരന്‍ സീറ്റ് നിവര്‍ത്തണമെന്ന ആവശ്യം ഉന്നയിച്ചാല്‍ താഴെ ബര്‍ത്തിലിരിക്കുന്നവര്‍ എതിര്‍ക്കാന്‍ പാടുള്ളതല്ല.
5. രാത്രി 10 മണിക്ക് ശേഷം ട്രെയിനില്‍ ഭക്ഷണം വില്‍ക്കാന്‍ പാടില്ല. എന്നാല്‍ ഇ കാറ്ററിംഗ് സേവനങ്ങള്‍ ഉപയോഗിച്ച് ഭക്ഷണം ഓര്‍ഡര്‍ ചെയ്യാവുന്നതാണ്.

പുതിയ നിയമങ്ങള്‍ ലംഘിക്കുന്നതായി കണ്ടെത്തിയാല്‍ യാത്രക്കാര്‍ക്കെതിരേ കര്‍ശന നടപടി സ്വീകരിക്കുമെന്ന് റെയില്‍വേ വ്യക്തമാക്കിയിട്ടുണ്ട്.