കോഴിക്കോട് : സമസ്ത കേരള ജം ഇ യ്യത്തുല്‍ ഉലമ കേന്ദ്ര മുശാവറ തീരുമാനിച്ച സമസ്ത ദേശീയ വിദ്യാഭ്യാസ പദ്ധതി അടുത്ത അധ്യയന വര്‍ഷം (2023-24)മുതല്‍ നടപ്പാക്കാന്‍ കോഴിക്കോട് സമസ്ത കാര്യാലയത്തില്‍ ചേര്‍ന്ന സമസ്ത കേരള ഇസ്ലാം മത വിദ്യാഭ്യാസ ബോര്‍ഡ് നിര്‍വ്വാഹക സമിതി യോഗം തീരുമാനിച്ചു. ഭൗതിക വിദ്യാഭ്യാസത്തോടൊപ്പം മത പഠനത്തിന് പ്രാമുഖ്യം നല്‍കുന്ന ശരീഅഃത്ത് സ്ട്രീമും മത വിദ്യാഭ്യാസത്തോടൊപ്പം ഭൗതിക പഠനത്തിന് പ്രാമുഖ്യം നല്‍കുന്ന ലൈഫ് സ്ട്രീമും ഉള്‍ക്കൊള്ളുന്നതാണ് പുതിയ വിദ്യാഭ്യാസ പദ്ധതി. സ്ഥാപനങ്ങളില്‍ നിന്നുള്ള അപേക്ഷകള്‍ വൈകാതെ സ്വീകരിച്ച് തുടങ്ങും.

കോഴിക്കോട് സമസ്ത കോമ്പൊണ്ടില്‍ ഓഫീസ് സജ്ജീകരിക്കാനും തീരുമാനിച്ചു. മാര്‍ച്ച് 15 ന് രാവിലെ 10 മണിക്ക് മലപ്പുറം റോസ് ലോഞ്ച് ഓഡിറ്റോറിയത്തില്‍ നടക്കുന്ന സമസ്ത വിശദീകരണ സംഗമം വിജയിപ്പിക്കാന്‍ യോഗം അഭ്യര്‍ത്ഥിച്ചു. പുതുതായി അഞ്ച് മദ്രസകള്‍ക്ക് കൂടി യോഗം അംഗീകാരം നല്‍കി. ഇതോടെ അംഗീകൃത മദ്രസകളുടെ എണ്ണം 10601ആയി. ഹയാത്തുല്‍ ഇസ്ലാം മദ്രസ്സ, കുക്കില, ബണ്ടുവാള്‍, (ദക്ഷിണ കന്നട), ഹയാത്തുല്‍ ഇസ്ലാം മദ്രസ, കുപ്പേരി, മുത്താമ്പി, (കോഴിക്കോട്), നൂറുല്‍ ഇസ്ലാം മദ്രസ, മുതുപൊയില്‍, കുറുകുത്തി (മലപ്പുറം), അലിഫ് ഇസ്‌ലാമിക് അക്കാദമി, ചളിങാട് (തൃശൂര്‍), തഅലീമുല്‍ ഖുര്‍ആന്‍ മദ്രസ, മബേല (മസ്‌കറ്റ് )എന്നീ മദ്രസകള്‍ക്കാണ് പുതുതായി അംഗീകാരം നല്‍കിയത്.

സമസ്ത കേരള ഇസ്ലാം മത വിദ്യാഭ്യാസ ബോര്‍ഡിന് കീഴില്‍ കഴിഞ്ഞ 4,5,6 തിയ്യതികളില്‍ ഇന്ത്യയിലും 10,11തിയ്യതികളില്‍ വിദേശങ്ങളിലും നടത്തിയ പൊതു പരീക്ഷ വിജയ പ്രദമായിരുന്നു എന്ന് യോഗം വിലയിരുത്തി. പരീക്ഷയില്‍ പങ്കെടുത്ത വിദ്യാര്‍ത്ഥികളെയും നടത്തിപ്പില്‍ പങ്കാളികളായവരെയും യോഗം അഭിനന്ദിച്ചു. സമസ്ത കേരള ജം ഇ യ്യത്തുല്‍ ഉലമ ജനറല്‍ സെക്രട്ടറി പ്രൊ. കെ. ആലിക്കുട്ടി മുസ്ലിയാര്‍ അധ്യക്ഷനായി. വിദ്യാഭ്യാസ ബോര്‍ഡ് ജനറല്‍ സെക്രട്ടറി എം. ടി. അബ്ദുള്ള മുസ്ലിയാര്‍ സ്വാഗതം പറഞ്ഞു. പി. പി. ഉമ്മര്‍ മുസ്ലിയാര്‍ കൊയ്യോട്, സയ്യിദ് മുഹമ്മദ് കോയ തങ്ങള്‍ ജമലു ല്ലൈലി, കെ. ടി. ഹംസ മുസ്ലിയാര്‍, കെ. ഉമര്‍ ഫൈസി മുക്കം, ഡോ. ബഹാഉദ്ധീന്‍ മുഹമ്മദ് നദ്‌വി കൂരിയാട്, എ. വി. അബ്ദുറഹിമാന്‍ മുസ്ലിയാര്‍, വാക്കോട് മൊയ്തീന്‍ കുട്ടി ഫൈസി, പി. കെ. ഹംസ ക്കുട്ടി മുസ്ലിയാര്‍ ആതൃശേരി, ഡോ. എന്‍. എ. എം. അബ്ദുല്‍ ഖാദര്‍, എം. സി. മായിന്‍ ഹാജി, കെ. എം. അബ്ദുള്ള മാസ്റ്റര്‍ കൊട്ടപ്പുറം, അബ്ദുല്‍ ഹമീദ് ഫൈസി അമ്പലക്കടവ്, അബ്ദുസ്സമദ് പൂക്കോട്ടൂര്‍, ഇ. മൊയ്തീന്‍ ഫൈസി പുത്തനയി, ഇസ്മയില്‍ കുഞ്ഞു ഹാജി മാന്നാര്‍, എസ്. സഈദ് മുസ്ലിയാര്‍ വിഴിഞ്ഞം, എം. അബ്ദുറഹിമാന്‍ മുസ്ലിയാര്‍ കൊടക് സംസാരിച്ചു. ജനറല്‍ മാനേജര്‍ കെ. മോയിന്‍കുട്ടി മാസ്റ്റര്‍ നന്ദി പറഞ്ഞു.