നിലവില്‍ നടന്നുകൊണ്ടിരിക്കുന്ന ഐപിഎല്‍ സീസണിനു ശേഷം ടീം ഇന്ത്യയെ കാത്തിരിക്കുന്ന പ്രധാന ടൂര്‍ണ്ണമെന്റാണ് ടി20 വേള്‍ഡ് കപ്പ്. അമേരിക്കയിലും വെസ്റ്റിന്‍ഡീസിലുമായാണ് കുട്ടി ക്രിക്കറ്റിന്റെ മാമാങ്കം അരങ്ങേറുന്നത്. ടൂര്‍ണ്ണമെന്റിലെ ഫേവറേറ്റുകളായി ക്രിക്കറ്റ് വിദഗ്ധര്‍ തിരഞ്ഞെടുത്തിരിക്കുന്നത് ടീം ഇന്ത്യയെയാണ്. മെയ് ആദ്യവാരമാണ് ലോകകപ്പ് ടീമിനെ ബിസിസിഐ പ്രഖ്യാപിക്കുന്നത്. ഐപിഎല്ലിലെ പ്രകടനങ്ങള്‍ താരങ്ങളുടെ സെലക്ഷനില്‍ നിര്‍ണായക പങ്കുവഹിക്കുമെന്നാണ് പുറത്തുവരുന്ന റിപ്പോര്‍ട്ടുകള്‍.

ഇപ്പോഴിതാ ടൂര്‍ണ്ണമെന്റിനായുള്ള പ്ലെയിങ് ഇലവനെ പ്രഖ്യാപിച്ചിരിക്കുകയാണ് മുന്‍ ഇന്ത്യന്‍ താരം മുഹമ്മദ് കൈഫ്. മലയാളി താരം സഞ്ജു സാംസനെ കൈഫ് ടീമില്‍ ഉള്‍പ്പെടുത്തിയില്ല എന്നതാണ് ശ്രദ്ധേയം.
രോഹിത് ശര്‍മ നയിക്കുന്ന ടീമില്‍ രോഹിത്തിനൊപ്പം ഓപ്പണിങ് സ്ഥാനം നല്‍കിയിരിക്കുന്നത് യുവതാരം യശ്വസി ജയ്‌സ്വാളിനാണ്. വണ്‍ ഡൗണായി വിരാട് കോലി ക്രീസില്‍ എത്തും. മുംബൈ താരങ്ങളായ സൂര്യകുമാര്‍ യാദവും ഹാര്‍ദിക് പാണ്ഡ്യയുമാണ് നാലും അഞ്ചും സ്ഥാനങ്ങളില്‍. സഞ്ജുവിന് പകരം വിക്കറ്റ് കീപ്പര്‍ ബാറ്റ്‌സ്മാനായി കൈഫ് തിരഞ്ഞെടുത്തിരിക്കുന്നത് ഋഷഭ് പന്തിനെയാണ്.

സ്പിന്നര്‍മാരായി ടീമിലുള്ളത് ജഡേജയും അക്‌സര്‍ പട്ടേലുമാണ്. ഇവര്‍ക്ക് ബാറ്റിംഗും വഴങ്ങുമെന്നാണ് കൈഫ് മുന്നോട്ടുവയ്ക്കുന്ന വാദം. ഒമ്പതാമനായി ടീമില്‍ ഉള്‍പ്പെടുത്തിയിരിക്കുന്നത് കുല്‍ദീപ് യാദവിനെയാണ്. ബുംറയേയും അര്‍ഷദീപിനേയുമാണ് സ്‌പെഷലിസ്റ്റ് പേസര്‍മാരായി കൈഫ് തിരഞ്ഞെടുത്തിരിക്കുന്നത്.സഞ്ജുവിനു പുറമേ കൈഫ് തന്റെ ടീമില്‍ നിന്നും റിങ്കു സിങ്ങിനേയും ശുഭ്മാന്‍ ഗില്ലിനേയും ഒഴിവാക്കിയിട്ടുണ്ട് എന്നതും ശ്രദ്ധേയമാണ്.