ദുബൈ: ലോകത്തിന്‍റെ വിവിധ ഭാഗങ്ങളിൽ പട്ടിണി കിടക്കുന്ന മനുഷ്യർക്ക് ​ ഭക്ഷണമെത്തിക്കുന്ന യു.എ.ഇയുടെ ‘‘വൺ ബില്യൺ മീൽസ്​’ പദ്ധതി ഇത്തവണയും നടക്കും. റമദാൻ ഒന്നുമുതൽ ആരംഭിക്കുന്ന പദ്ധതി ലക്ഷ്യത്തിൽ എത്തുന്നത്​ വരെ തുടരും. ഒരു കോടി പേർക്ക് നൽകി 2020 ൽ തുടങ്ങിയ പദ്ധതിയാണ് ഇപ്പോൾ നൂറ് കോടിയിൽ എത്തി നിൽക്കുന്നത്.

റമദാനിൽ പാവപ്പെട്ടവർക്ക്​ ഭക്ഷണമെത്തിക്കുന്ന പദ്ധതി ഇത്തവണയുമുണ്ടാകുമെന്ന്​ യു.എ.ഇ വൈസ്​ പ്രസിഡന്‍റും ദുബൈ ഭരണാധികാരിയുമായ ശൈഖ്​ മുഹമ്മദ്​ ബിൻ റാശിദ്​ ആൽ മക്​തൂം പ്രഖ്യാപിച്ചു. ലോകത്ത്​ പത്തി​ലൊരാൾ പട്ടിണി നേരിടുന്നുണ്ടെന്നും മാനവികവും ധാർമികവും ഇസ്​ലാമികവുമായ ദൗത്യമെന്ന നിലയിലാണ്​ പദ്ധതി ഇത്തവണയും തുടരുന്നതെന്ന്​ ശൈഖ്​ മുഹമ്മദ്​ ട്വിറ്ററിലൂടെ വ്യക്​തമാക്കി. വരും ദശകത്തിലേക്ക്​ സുസ്​ഥിരമായ രീതിയിൽ ഭക്ഷണം ലഭ്യമാക്കുകയാണ്​ പദ്ധതി വഴി ഇത്തവണ ലക്ഷ്യമിടുന്നതെന്നും അദ്ദേഹം കൂട്ടിച്ചേർത്തു.

‘‘വൺ ബില്യൺ മീൽസ്​’ പദ്ധതിയുടെ ഭാഗമായി കഴിഞ്ഞ വർഷം ആരംഭിച്ച പദ്ധതിയിൽ 50 രാജ്യങ്ങളിലേക്കാണ് യു.എ.ഇ.​​ സഹായമെത്തിച്ചത്​. ഫലസ്തീൻ, ബ്രസീൽ, ഇന്ത്യ, ബംഗ്ലാശേദ്​, പാകിസ്താൻ, ടുണീഷ്യ, ഇറാഖ്​, ഈജിപ്ത്​, ലബനൻ, ജോർദൻ, സുഡാൻ, യമൻ, കൊസോവോ, നേപ്പാൾ, കെനിയ, സെനഗൽ തുടങ്ങിയ രാജ്യങ്ങളിലെല്ലാം കഴിഞ്ഞ വർഷം ഭക്ഷണപ്പൊതി എത്തിച്ചു.

2030ഓടെ പട്ടിണി തുടച്ചു നീക്കാനുള്ള യു.എന്നിന്‍റെ ലക്ഷ്യത്തെ പിന്തുണക്കുക കൂടിയാണ് പദ്ധതിയിലൂടെ ലക്ഷ്യമിടുന്നത്. സ്വകാര്യ സ്ഥാപനങ്ങൾക്കും വ്യക്​തികൾക്കും പദ്ധതിയിലേക്ക്​ സംഭാനകൾ നൽകാനാവും. ഭക്ഷണപൊതികളായും വൗച്ചറുകളായുമാണ്​ ആളുകളിലേക്ക്​ എത്തുക.