സ്വന്തംലേഖകൻ
തിരുവനന്തപുരം
ബംഗാൾ ഉൾക്കടലിൽ രൂപപ്പെട്ട 'അസാനി' ചുഴലിക്കാറ്റിന്റെ സ്വാധീനത്തിൽ സംസ്ഥാനത്ത് പരക്കെ മഴ ലഭിച്ചു. ഇന്നലെ പത്തനംതിട്ട, ആലപ്പുഴ, കോട്ടയം, എറണാകുളം, ഇടുക്കി, പാലക്കാട് ജില്ലകളിൽ യെല്ലോ അലർട്ട് നൽകിയിരുന്നു. തിങ്കളാഴ്ച രാവിലെ എട്ട് മണി മുതൽ ഇന്നലെ രാവിലെ എട്ട് വരെയുള്ള സമയത്ത് പൂഞ്ഞാർ 7 സെ.മീ, കരിപ്പൂർ 6 സെ.മീ, കോഴിക്കോട്, തൊടുപുഴ, ഇടുക്കി, ആനക്കയം 5 സെ.മീ വീതം, മൂന്നാർ, കൊയിലാണ്ടി, തലശ്ശേരി, കോന്നി 4 സെ.മീ വീതം, പുനലൂർ, കൊല്ലങ്കോട് 3 സെ.മീ വീതം, കാഞ്ഞിരപ്പള്ളി, വൈക്കം, പീരുമേട്, വടകര, തെൻമല 2 സെ.മീ എന്നിങ്ങനെ മഴ ലഭിച്ചു. ശനിയാഴ്ച വരെ മഴ തുടരുമെന്നാണ് പ്രവചനം. കാറ്റിന്റെ വേഗത മണിക്കൂറിൽ 50 കി.മീ വരെ ആകാൻ സാധ്യതയുള്ളതിനാൽ കേരള, ലക്ഷദ്വീപ് തീരങ്ങളിൽ ശനിയാഴ്ച വരെ മത്സ്യബന്ധനം പാടില്ലെന്ന് മുന്നറിയിപ്പുണ്ട്.