വാടാനപ്പള്ളി: തൃത്തല്ലൂരില്‍ കാറും ബൈക്കും കൂട്ടിയിടിച്ച് ബൈക്ക് യാത്രക്കാരനായ യുവാവിന് പരുക്കേറ്റു. തൃത്തല്ലൂര്‍ കോഴിശേരി വീട്ടില്‍ ശോഭനന്റെ മകന്‍ ഉണ്ണികൃഷ്ണ(18)നാണ് പരുക്കേറ്റത്.
ഇന്നലെ രാവിലെ എട്ടുമണിയോടെയായിരുന്നു അപകടം. ഉണ്ണികൃഷ്ണന്‍ ഓടിച്ചിരുന്ന ബൈക്കില്‍ മറ്റൊരു കാര്‍ തട്ടിയതിനെ തുടര്‍ന്ന് ബൈക്കിന്റെ കണ്ണാടി തകര്‍ന്നിരുന്നു. നിര്‍ത്താതെ പോയ ഈ കാറിനെ പിന്തുടരുന്നതിനിടെ തൃത്തല്ലൂര്‍ എഴാം കല്ലിനു സമീപം വച്ച് ബൈക്ക് എതിരെവന്ന കാറില്‍ ഇടിക്കുകയായിരുന്നു. അപകടത്തില്‍ അന്‍പത് മീറ്റര്‍ അകലേക്ക് തെറിച്ചുവീണ ഉണ്ണികൃഷ്ണന് തലക്കും ഇരുകാലുകള്‍ക്കും പരുക്കേറ്റു. പരുക്കേറ്റ ഉണ്ണികൃഷ്ണനെ വാടാനപ്പള്ളി ആക്ട്‌സ് പ്രവര്‍ത്തകര്‍ തൃശൂര്‍ വെസ്റ്റ്‌ഫോര്‍ട്ട് ഹൈടെക് ആശുപത്രിയില്‍ പ്രവശിപ്പിച്ചു.