നിലപാടിൽ അയവില്ലാതെ
സർക്കാരും സി.പി.എമ്മും

പ്രത്യേക ലേഖകൻ
തിരുവനന്തപുരം
സിൽവർലൈൻ വിരുദ്ധ സമരത്തിനെതിരേ രജിസ്റ്റർ ചെയ്ത കേസുകൾ പിൻവലിക്കില്ലെന്ന് സർക്കാർ. കേസുകളിൽ കുറ്റപത്രം നൽകുമെന്നാണ് പൊലിസ് നിലപാട്. കല്ലിടൽ തടഞ്ഞിടത്തെല്ലാം കേസെടുത്തിരുന്നു. വിവിധ ജില്ലകളിലായി 280 കേസുകളുണ്ട്. ഏറ്റവും കൂടുതൽ കോട്ടയത്താണ് 38. കണ്ണൂരിൽ 17ഉം കോഴിക്കോട്ട് 14ഉം കൊല്ലത്ത് 10ഉം തിരുവനന്തപുരത്ത് 12ഉം കേസുകളുണ്ട്. നാട്ടുകാരും സ്ത്രീകളും രാഷ്ട്രീയക്കാരും സമരസമിതിക്കാരുമുൾപ്പെടെ 700 പേരാണ് പ്രതിപ്പട്ടികയിൽ.

കല്ലിടൽ ഉപേക്ഷിച്ചതോടെ കേസുകൾ പിൻവലിക്കണമെന്ന് പ്രതിപക്ഷവും സമരസമിതിയും ആവശ്യപ്പെട്ടെങ്കിലും അത് മുഖവിലയ്ക്ക് എടുക്കണ്ട എന്നാണ് തീരുമാനം. രജിസ്റ്റർ ചെയ്ത കേസുകളിൽ തുടർനടപടി സ്വീകരിക്കും. രണ്ട് മാസത്തിനുള്ളിൽ കുറ്റപത്രവും നൽകും. പൊതുമുതൽ നശിപ്പിച്ചു, ഔദ്യോഗിക കൃത്യനിർവഹണം തടസപ്പെടുത്തി, നിയമം ലംഘിച്ച് ആൾക്കൂട്ടം സൃഷ്ടിച്ചു തുടങ്ങിയ വകുപ്പുകളാണ് ചുമത്തിയിരിക്കുന്നത്. എന്നാൽ അറസ്റ്റും റിമാൻഡും ഉണ്ടാവില്ല. കേസിൽ പെട്ടവർ പൊലിസ് സ്റ്റേഷനിൽ കയറി ഇറങ്ങേണ്ടിവരില്ല. പക്ഷെ കോടതി കയറേണ്ടി വരും. കേസ് പിൻവലിക്കാനുള്ള നടപടി തുടങ്ങേണ്ടത് കുറ്റപത്രം നൽകിയ ശേഷമാണെന്നതിനാൽ സർക്കാർ പിന്നീട് തീരുമാനിക്കട്ടേയെന്നാണ് പൊലിസിന്റെ നിലപാട്. കേസ് പിൻവലിച്ചാൽ സമരം ശക്തിപ്പെടുമെന്നും അതിനാൽ അതു വേണ്ടെന്നുമാണ് സർക്കാരിന്റെയും സി.പി.എമ്മിന്റെയും നിലപാട്. കല്ല് പൊതുമുതലാണെന്ന് പൊലിസിന് നിയമോപദേശം ലഭിച്ചിരുന്നു.
കല്ലിടലിൽ സർക്കാർ പിൻമാറിയത് തൃക്കാക്കരയിൽ രാഷ്ട്രീയ വിജയമാക്കാൻ പ്രതിപക്ഷം തയാറെടുക്കുമ്പോൾ കേസ് തുടരുമെന്ന് കാട്ടി പ്രതിരോധിക്കാനാണ് സർക്കാർ ശ്രമം.