തിരുവനന്തപുരം: ലക്ഷദ്വീപ് അഡ്മിനിസ്‌ട്രേറ്റര്‍ക്കെതിരെ രൂക്ഷ വിമര്‍ശനവുമായി പ്രതിപക്ഷ നേതാവ് വി.ഡി സതീശന്‍. ആട്ടിന്‍ തോലണിഞ്ഞ വര്‍ഗീയ കോമരമാണ് അഡ്മിനിസ്‌ട്രേറ്ററെന്ന് അദ്ദേഹം തുറന്നടിച്ചു. ഇയാള്‍ കാണിക്കുന്നത് തോന്നിവാസം. ദ്വീപില്‍നിന്ന് ഓടിക്കണം. ലക്ഷദ്വീപുകാരുടെ തനിമയെ കേന്ദ്ര സര്‍ക്കാര്‍ തകര്‍ക്കുന്നുവെന്നും അദ്ദേഹം ചൂണ്ടിക്കാട്ടി.

ലക്ഷദ്വീപ് അഡ്മിനിസ്ട്രേറ്റര്‍ പ്രഫുല്‍ പട്ടേലിനെതിരെ ശക്തമായ പ്രതിഷേധമാണ് രാജ്യമെങ്ങും ഉയരുന്നത്. അധികാരമേറ്റതിന് പിന്നാലെ ഫാഷിസ്റ്റ് അജണ്ടകള്‍ നടപ്പിലാക്കുകയാണ് ഇയാള്‍. പ്രഫുല്‍ സ്ഥാനമേറ്റശേഷം നടപ്പിലാക്കുന്ന ഭരണപരിഷ്‌കാരങ്ങള്‍ ദ്വീപ് ജനതയുടെ സ്വസ്ഥതയും സമാധാനവും തകര്‍ക്കുന്നതാണ്.

മുന്‍ ലക്ഷദ്വീപ് അഡ്മിനിസ്ട്രേറ്റര്‍ ദിനേശ്വര്‍ ശ്വാസകോശ രോഗത്തെ തുടര്‍ന്ന് പെട്ടെന്ന് മരിച്ചതോടെയാണ് കഴിഞ്ഞ ഡിസംബറില്‍ പ്രഫുല്‍ പട്ടേല്‍ നിയമിക്കപ്പെട്ടത്. മുന്‍ ഗുജറാത്ത് ആഭ്യന്തര സഹമന്ത്രിയാണ് പ്രഫുല്‍ പട്ടേല്‍.