കവരത്തി: അഡ്മിനിസ്‌ട്രേറ്റര്‍ പ്രഫുല്‍ പട്ടേലിന്റെ ഭരണപരിഷ്‌കാരങ്ങള്‍ക്കെതിരേ ഒറ്റക്കെട്ടായി പോരാടാന്‍ ലക്ഷദ്വീപിലെ രാഷ്ട്രീയകക്ഷികളുടെ  നേതാക്കളും ജനപ്രതിനിധികളും പങ്കെടുത്ത സര്‍വകക്ഷി യോഗം തീരുമാനിച്ചു. 

കൊവിഡ് പശ്ചാത്തലത്തില്‍ ഓണ്‍ലൈന്‍ പ്രതിഷേധങ്ങള്‍ ശക്തമാക്കാനും നിയമപോരാട്ടം ആരംഭിക്കാനും യോഗം തീരുമാനിച്ചു. ഹൈക്കോടതിയെ സമീപിക്കുന്നതിനുള്ള നടപടികള്‍ പിന്നീട് സ്വീകരിക്കും.

 

 ജില്ലാ കലക്ടര്‍ അസ്‌കര്‍ അലിയുടെ തെറ്റിദ്ധരിപ്പിക്കുന്ന വാര്‍ത്താസമ്മേളനത്തിനെതിരേ ഇന്നലെ തന്നെ ദ്വീപില്‍ ഓണ്‍ലൈന്‍ പ്രതിഷേധങ്ങള്‍ ആരംഭിച്ചു. വിദ്യാര്‍ഥികളും യുവാക്കളും ഓണ്‍ലൈനിലൂടെ പ്രതിഷേധവുമായി രംഗത്തെത്തി. ഇതിന്റെ ഭാഗമായി  വീടുകളില്‍ പ്രതിഷേധ ബോര്‍ഡുകളും ഉയര്‍ത്തി.

 പ്രതിഷേധ സമരങ്ങളും നിയമപോരാട്ടങ്ങളും ഏകോപിപ്പിക്കുന്നതിനായി എല്ലാ പാര്‍ട്ടി പ്രതിനിധികളേയും ഉള്‍പ്പെടുത്തി ഒരു കോര്‍ കമ്മിറ്റി രൂപീകരിക്കാന്‍ സര്‍വകക്ഷി യോഗം തീരുമാനിച്ചു. അടുത്ത ദിവസം  തന്നെ ഈ കമ്മിറ്റിക്ക് രൂപം നല്‍കും. 

 

കമ്മിറ്റിയുടെ ആദ്യ യോഗം ശനിയാഴ്ച ഓണ്‍ലൈനില്‍ ചേര്‍ന്ന് തുടര്‍ നടപടികള്‍ക്ക് രൂപം നല്‍കും. എല്ലാവരും ഒറ്റക്കെട്ടായി മുന്നോട്ട് പോകുമെന്ന് നേതാക്കള്‍ പറഞ്ഞു. കേരളത്തില്‍നിന്ന് ലഭിക്കുന്ന പിന്തുണയും ദേശീയതലത്തില്‍ വിഷയം ചര്‍ച്ച ചെയ്യുന്നതിലുള്ള നന്ദിയും നേതാക്കള്‍ അറിയിച്ചു.

 

ഓണ്‍ലൈനില്‍ ചേര്‍ന്ന യോഗത്തില്‍ ലക്ഷദ്വീപ് എം.പി മുഹമ്മദ് ഫൈസല്‍, മുന്‍ എം.പിയും കോണ്‍ഗ്രസ് പ്രദേശ് കമ്മിറ്റി പ്രസിഡന്റുമായ അഡ്വ. ഹംദുല്ല സഈദ്, ജില്ലാ പഞ്ചായത്ത് പ്രസിഡന്റ് ഹസന്‍ ബി, ജെ.ഡി (യു) ലക്ഷദ്വീപ് അധ്യക്ഷന്‍ സോ. മുഹമ്മദ് സാദിഖ്, ലക്ഷദ്വീപ് എം.പി മുഹമ്മദ് ഫൈസല്‍, ബി.ജെ.പി ജനറല്‍ സെക്രട്ടറി എച്ച്. കെ മുഹമ്മദ് കാസിം, കോണ്‍ഗ്രസ് നേതാവ് യു.സി.കെ തങ്ങള്‍, യൂത്ത് കോണ്‍ഗ്രസ് പ്രസിഡന്റ് എം. അലി അക്ബര്‍, സി.പി.എം പ്രതിനിധികളായ കെ.പി സലിം, കോമളം കോയ, മിനിക്കോയി പഞ്ചായത്ത് വൈസ് പ്രസിഡന്റ് ഡോ. മുനീര്‍, സി.പി.ഐ പ്രതിനിധി പി.പി നജ്മുദ്ദീന്‍  പങ്കെടുത്തു.