തിരുവനന്തപുരം
തിരുവനന്തപുരം ആർ.ഡി.ഒ കോടതിയിൽനിന്ന് തൊണ്ടിമുതലുകൾ കാണാതായ സംഭവത്തിൽ ദുരൂഹത.
കഴിഞ്ഞ വർഷം എ.ജി നടത്തിയ ഓഡിറ്റിലും സ്വർണമെല്ലാം ലോക്കറിലുണ്ടെന്നായിരുന്നു കണ്ടെത്തൽ. എന്നാൽ 2010 മുതൽ 2019 വരെയുള്ള കാലഘട്ടത്തിൽ ലോക്കറിലെത്തിയ സ്വർണവും പണവും കാണാനില്ലെന്നാണ് സബ് കലക്ടർ മാധവിക്കുട്ടി നടത്തിയ പ്രാഥമിക അന്വേഷണത്തിൽ കണ്ടെത്തിയത്.
പരിശോധയിലുണ്ടായ വീഴ്ചയാണോ, അതോ എ.ജി റിപ്പോർട്ടിനു ശേഷമാണോ മോഷണമെന്ന് പൊലിസ് അന്വേഷണം തുടങ്ങി. 1982 മുതലുള്ള തൊണ്ടിമുതലുകളാണ് സബ് കലക്ടർ പരിശോധിച്ചത്.
ഇതിൽ 2010 മുതൽ 2019 വരെ ആർ.ഡി.ഒ ലോക്കറിൽ സൂക്ഷിച്ചിരുന്ന തൊണ്ടിമുതലുകളാണ് മോഷണം പോയിരിക്കുന്നതായി കണ്ടെത്തിയത്.
69 പവൻ സ്വർണവും പണവും വെള്ളിയാഭരണങ്ങളുമാണ് കാണാതെ പോയിരിക്കുന്നത്. 2021 ഫ്രെബ്രുവരിയിലെ എ.ജിയുടെ പരിശോധനാ റിപ്പോർട്ടനുസരിച്ച് 2017 മുതൽ ലോക്കറിലേക്കെത്തിയ 220 ഗ്രാം സ്വർണം സുരക്ഷിതമാണ്. പൊലിസ് അന്വേഷണത്തിനൊപ്പം വിജിലൻസ് അന്വേഷണവും നടത്താൻ സർക്കാർ തീരുമാനിച്ചിട്ടുണ്ട്.
ആർ.ഡി.ഒ ഓഫിസിലെ സീനിയർ സൂപ്രണ്ടുമാരാണ് തൊണ്ടിമുതലിന്റെ സൂക്ഷിപ്പുകാരൻ. ഓരോ സൂപ്രണ്ടുമാർ മാറിവരുമ്പോഴും തൊണ്ടിമുതലുകൾ പരിശോധിച്ച് രജിസ്റ്ററിൽ രേഖപ്പെടുത്തിയ ശേഷമാണ് ചുമതലേൽക്കണ്ടത്. 2017ൽ ചുമതലയേറ്റ ഒരു സൂപ്രണ്ട് മാത്രമാണ് തൊണ്ടിമുതൽ ഓരോന്നും പരിശോധിച്ച് രജിസ്റ്ററിൽ രേഖപ്പെടുത്തിയശേഷം ചുമതലയേറ്റത്. അതിനുശേഷം ചുമതലയേറ്റ ഉദ്യോഗസ്ഥർ കൃത്യമായ പരിശോധന നടത്തിയിട്ടില്ല. അതിനാൽ 2017 മുതലുള്ള എല്ലാ സീനിയർ സൂപ്രണ്ടുമാരെയും പൊലിസ് ചോദ്യം ചെയ്യും.
തൊണ്ടിമുതൽ രജിസ്റ്ററുകളും തൊണ്ടിമുതലും പൊലിസ് കസ്റ്റഡിലെടുത്തിട്ടുണ്ട്. രജിസ്റ്ററും തൊണ്ടിമുതലുകളും താരതമ്യം ചെയ്ത് പരിശോധിക്കാൻ രണ്ടുദിവസം വേണ്ടിവരുമെന്നാണ് അന്വേഷണ സംഘം പറയുന്നത്. വിജിലൻസിന് കേസ് കൈമാറുന്നതുവരെ പൊലിസ് അന്വേഷണം തുടരും.