മഞ്ചേശ്വരം: കര്‍ണ്ണാടകയില്‍ നിന്നും ബസില്‍ കടത്തിക്കൊണ്ടു വരികയായിരുന്ന ലഹരി ഉല്‍പ്പന്നങ്ങള്‍ പിടികൂടി. സംഭവത്തില്‍ തെക്കില്‍ കൊറക്കുന്നിലെ മൊയ്തീനെ(67) എക്‌സൈസ് സംഘം അറസ്റ്റ് ചെയ്തു.
ഇന്നലെ രാവിലെ മഞ്ചേശ്വരം ചെക്ക് പോസ്റ്റില്‍ വാഹന പരിശോധന നടത്തുകയായിരുന്ന എക്‌സൈസ് സംഘമാണ് കാസര്‍കോട് ഭാഗത്തേക്ക് വരുകയായിരുന്ന കര്‍ണ്ണാടക  ആര്‍.ടി.സി ബസില്‍ കടത്തുകയായിരുന്ന 5,600 പാക്കറ്റ് പുകയില ഉല്‍പ്പന്നങ്ങള്‍, ലഹരികലര്‍ന്ന മിഠായികള്‍, ഐസ്‌ക്രീമുകളില്‍ ചേര്‍ക്കുന്ന ലഹരി പേസ്റ്റുകള്‍, ടിന്‍മസാലകള്‍ തുടങ്ങിയ വസ്തുക്കള്‍ പിടിച്ചെടുത്തത്.
പ്രതിയേയും പുകയിലയുല്‍പ്പന്നങ്ങളും എക്‌സൈസ് സംഘം മഞ്ചേശ്വരം പൊലിസിനു കൈമാറി. എക്‌സൈസ് ഇന്‍സ്‌പെക്ടര്‍ ശങ്കര്‍, അസിസ്റ്റന്റ് എക്‌സൈസ് ഇന്‍സ്‌പെക്ടര്‍ പ്രേമരാജന്‍, പ്രിവന്റീവ് ഓഫിസര്‍  ബാലകൃഷ്ണന്‍, സിവില്‍ എക്‌സൈസ് ഓഫിസര്‍മാരായ  ഷേക്ക് അബ്ദുല്‍ ബഷീര്‍, രജിത് മൈക്കിള്‍ എന്നിവരാണ് സംഘത്തിലുണ്ടായിരുന്നത്.