കയ്പമംഗലം: കയ്പമംഗലത്ത് തെങ്ങുവീണ് വീട് തകര്‍ന്നു. വഴിയമ്പലം കിഴക്ക് മലയാറ്റില്‍ ക്ഷേത്രത്തിനു സമീപം പരത്തേഴത്ത് സഗീറിന്റെ ഓടിട്ട വീടാണ് തകര്‍ന്നത്. ഇന്നലെ രാവിലെ പതിനൊന്ന് മണിയോടെയാണ് വീട്ടുമുറ്റത്തെ തെങ്ങ് കടപുഴകി വീണത്. സംഭവസമയം സഗീറിന്റെ ഭാര്യ സൈനബയും സമീപത്തെ വീട്ടിലെ മൂന്ന്  കുട്ടികളും വീട്ടുമുറ്റത്ത് നിന്നിരുന്നു. ശബ്ദം കേട്ട് ഇവര്‍ ഓടി മാറിയതിനാല്‍ പരുക്കേല്‍ക്കാതെ രക്ഷപ്പെട്ടു.  മുറ്റത്ത് വെച്ചിരുന്ന സ്‌കൂട്ടറിനും കേടുപാടുകള്‍ സംഭവിച്ചിട്ടുണ്ട്. പഞ്ചായത്ത്, വില്ലേജ് അധികൃതര്‍ സ്ഥലത്തെത്തിയിരുന്നു.