തിരുവനന്തപുരം: സര്‍ക്കാര്‍ ആശുപത്രിയിലെത്തുന്ന ഓരോ രോഗിയുടെയും ജീവന്‍ വിലപ്പെട്ടതാണെന്നും മെഡിക്കല്‍ കോളജില്‍ വൃക്ക മാറ്റിവെക്കല്‍ ശസ്ത്രക്രിയ വൈകി രോഗി മരിച്ച സംഭവത്തിലെ വീഴ്ചയുടെ ഉത്തരവാദിത്വം ഡോക്ടര്‍മാര്‍ക്കാണെന്നും ആരോഗ്യമന്ത്രി വീണാജോര്‍ജ്.

ഇത്തരത്തിലുള്ള അനാസ്ഥ അനുവദിക്കില്ലെന്നും മന്ത്രി പറഞ്ഞു. യൂറോളജി, നെഫ്രോളജി മേധാവികളെ സസ്‌പെന്റ് ചെയ്തത് അന്വേഷണ വിധേയമാണ്. അല്ലാതെ ശിക്ഷാനടപടിയല്ല. അന്വേഷണ റിപ്പോര്‍ട്ട് വന്നാല്‍ നടപടിയെടുക്കുമെന്നും മന്ത്രി മാധ്യമങ്ങളോട് പറഞ്ഞു.

സര്‍ക്കാര്‍ ആശുപത്രികള്‍ ജനങ്ങളുടേത്. ജനങ്ങളുടെ നികുതി കൊണ്ടാണ് ആശുപത്രികള്‍ പ്രവര്‍ത്തിക്കുന്നത്. ശുപാര്‍ശക്ക് ആളില്ലാത്തവര്‍ക്കും നല്ല ചികിത്സ ലഭിക്കണം. മെഡിക്കല്‍ കോളജ് പ്രവര്‍ത്തനങ്ങളെ കുറിച്ച് കൃത്യമായ നിര്‍ദ്ദേശങ്ങള്‍ നല്‍കിയിട്ടുണ്ട്. അത് പാലിച്ചില്ലെങ്കില്‍ കടുത്ത നടപടി. രോഗികളുടെ ഉത്തരവാദിത്വം ഡോക്ടര്‍മാര്‍ക്കാണ്. വിദ്യാര്‍ത്ഥികള്‍ക്കല്ലെന്നും മന്ത്രി ചൂണ്ടിക്കാട്ടി.