മുംബൈ: വിമത എം.എല്‍.എമാരെ അനുനയിപ്പിക്കാന്‍ അവസാന അടവുമായി ശിവസേന. എല്ലാ എം.എല്‍.എമാര്‍ക്കും മഹാ അഘാഡി സഖ്യം വിടണമെന്നാണ് അഭിപ്രായമെങ്കില്‍ അതു പരിഗണിക്കാമെന്ന് മുതിര്‍ന്ന ശിവസേനാ നേതാവ് സഞ്ജയ് റൗത്ത് പ്രഖ്യാപിച്ചു. വിമത എം.എല്‍.എമാര്‍ അസമില്‍ നിന്ന് 24 മണിക്കൂറിനകം തിരിച്ചുവരണം. അഭിപ്രായം പറയേണ്ടത് അവിടെയിരുന്നല്ല, മുഖ്യമന്ത്രിയും ശിവസേന നേതാവുമായ ഉദ്ദവ് താക്കറേയുമായി നേരില്‍ കണ്ട് ചര്‍ച്ച ചെയ്ത് ശേഷം ബാക്കി കാര്യങ്ങള്‍ തീരുമാനിക്കാമെന്നും ശിവസേന എം.പി പറഞ്ഞു.

അതേസമയം, ശിവസേനയുടെ ഔദ്യോഗിക വിഭാഗം 'വര്‍ഷയില്‍' വിളിച്ചുകൂട്ടിയ പാര്‍ട്ടി യോഗത്തില്‍ 12 എംഎല്‍എമാര്‍ മാത്രമാണ് പങ്കെടുക്കുന്നത്. അജയ് ചൗധരി, രവീന്ദ്ര വൈക്കര്‍, രാജന്‍ സാല്‍വി, വൈഭവ് നായിക്, നിതിന്‍ ദേശ്മുഖ്, ഉദയ് സാമന്ത്, സുനില്‍ റാവുത്ത്, സുനില്‍ പ്രഭു, ദിലീപ് ലാന്‍ഡെ, രാഹുല്‍ പാട്ടീല്‍, രമേഷ് കോര്‍ഗോങ്കര്‍, പ്രകാശ് ഫതര്‍പേക്കര്‍ എന്നിവരാണ് നിലവില്‍ ഉദ്ദവ് താക്കറെയെ പിന്തുണയ്ക്കുന്ന എം.എല്‍.എമാര്‍. എന്നാല്‍ ദാദറിലെ ശിവസേന ഭവനില്‍ ഭാരവാഹികളുടെ അടിയന്തര യോഗവും വിളിച്ചിട്ടുണ്ട്.