ലണ്ടന്‍: യൂറോകപ്പ് വാര്‍ത്താസമ്മേളനത്തിനെത്തുന്നവര്‍ക്ക് കുടിക്കാന്‍ ഒഫിഷ്യല്‍ സ്‌പോണ്‍സറായ കൊക്കകോളയുടെ പാനീയം മുന്നിലെത്തുക സ്വാഭാവികം. എന്നാല്‍ മുന്നിലുണ്ടായിരുന്ന കൊക്കകോള എടുത്ത് മാറ്റി വാര്‍ത്തയില്‍ ഇടം നേടിയിരിക്കുകയാണ് ക്രിസ്റ്റ്യാനോ റൊണാള്‍ഡോ.
മത്സരത്തിനു മുന്നോടിയായുള്ള വാര്‍ത്താസമ്മേളനത്തിനെത്തിയ താരം മുന്നിലുണ്ടായിരുന്ന രണ്ട് കോളയുടെ കുപ്പിയും മാറ്റി മുന്നില്‍ വെള്ളക്കുപ്പി വെക്കുകയായിരുന്നു. വെള്ളക്കുപ്പി ഉയര്‍ത്തിക്കാട്ടി വെള്ളമാണ് കുടിക്കേണ്ടതെന്നും ക്രിസ്റ്റിയാനോ പറഞ്ഞു. ഭക്ഷണ കാര്യത്തില്‍ എന്നും കടുപ്പക്കാരനായ ക്രിസ്റ്റിയാനോയ്ക്ക് കോളകളോട് ഇഷ്ടമില്ലെന്ന നിലപാട് പരസ്യപ്പെടുത്തുകയായിരുന്നു ലക്ഷ്യം.
ക്രിസ്റ്റ്യാനോയുടെ മകന്‍ ഇതേ ഇഷ്ടം പാലിക്കാത്തതിന് മുന്‍പ് താരം പരിഭവം പങ്കുവെച്ചിരുന്നു. 'മകന്‍ ലോക ഫുട്‌ബോളറാകുമോ എന്ന് കണ്ടറിയണം. അവന്‍ കോള കുടിച്ചും ജങ്ക് ഫുഡ് കഴിച്ചുമാണ് നടക്കുന്നത്. അത് എന്നെ അസ്വസ്ഥനാക്കുന്നു' എന്നായിരുന്നു ക്രിസ്റ്റിയാനോയുടെ പ്രതികരണം.