തൊടുപുഴ: കൊടുവേലി സാഞ്‌ജോസ് പബ്ലിക് സകൂളില്‍ നടന്ന ജില്ലാ സബ്-ജൂനിയര്‍ ടെന്നിക്വയ്റ്റ് ചാംപ്യന്‍ഷിപ്പില്‍  ആണ്‍കുട്ടികളുടെ വിഭാഗത്തില്‍ സെന്റ് അഗസ്റ്റിന്‍സ് കരിങ്കുന്നവും പെണ്‍കുട്ടികളുടെ വിഭാഗത്തില്‍ വിന്നേഴ്‌സ് പബ്ലിക് സ്‌കൂള്‍ കരിമണ്ണൂരും ചാംപ്യന്‍മാരായി.
ഇരു വിഭാഗങ്ങളിലും യഥാക്രമം കോ-ഓപ്പറേറ്റീവ് പബ്ലിക് സകൂളും കൊടുവേലി സാഞ്‌ജോസ് പബ്ലിക് സകൂളും രണ്ടാം സ്ഥാനം കരസ്ഥമാക്കി. പെണ്‍കുട്ടികളില്‍ മൂന്നാം സ്ഥാനത്തിന് ജയ്‌റാണി സ്‌കൂളും ആണ്‍കുട്ടികളില്‍ കോ-ഓപ്പറേറ്റീവ് പബ്ലിക് സ്‌കൂളും അര്‍ഹത നേടി. രാവിലെ 10ന് സ്‌കൂള്‍ പ്രിന്‍സിപ്പല്‍ ഫാ.ജോണ്‍സണ്‍ പാലപ്പള്ളില്‍ മത്സരങ്ങള്‍ ഉദ്ഘാടനം ചെയ്തു. ജില്ലാ അസോസിയേഷന്‍ പ്രസിഡന്റ് ക്ലമന്റ് ഇമ്മാനുവല്‍ യോഗത്തില്‍ അധ്യക്ഷനായിരുന്നു. ജില്ലാ ഒളിംപിക് അസോസിയേഷന്‍ സെക്രട്ടറി എം എസ് പവനന്റെ അധ്യക്ഷതയില്‍ നടന്ന സമാപന ചടങ്ങില്‍ ജില്ലാ പ്രസിഡന്റ് ക്ലമന്റ് ഇമ്മാനുവല്‍ വിജയികള്‍ക്ക് സര്‍ട്ടിഫിക്കറ്റുകളും ട്രോഫികളും വിതരണം ചെയ്തു.