മ്യൂണിക്: വാര്‍ത്താസമ്മേളനത്തിനിടെ ക്രിസ്റ്റിയാനോ റൊണാള്‍ഡോ കൊക്ക കോള ബോട്ടില്‍ മാറ്റിവെച്ചതിന്റെ അലയൊലികള്‍ അടങ്ങും മുന്‍പേ സമാന പ്രവൃത്തിയുമായി പോള്‍ പോഗ്ബയും രംഗത്ത്. ഇക്കുറി നീക്കിയത് മദ്യക്കുപ്പിയാണെന്ന് മാത്രം.
ജര്‍മനിയെ എതിരില്ലാത്ത ഒരു ഗോളിന് തകര്‍ത്ത ശേഷം വാര്‍ത്താസമ്മേളനത്തിന് എത്തിയപ്പോഴായിരുന്നു ഫ്രഞ്ച് താരത്തിന്റെ പ്രവൃത്തി. മത്സരത്തില്‍ തകര്‍പ്പന്‍ പ്രകടനം കാഴ്ചവെച്ച പോള്‍ പോഗ്ബ മാന്‍ ഓഫ് ദി മാച്ചായി തിരഞ്ഞെടുക്കപ്പെട്ടിരുന്നു. കൊക്ക കോളക്കും വെള്ളക്കുപ്പിക്കും ഒപ്പമിരുന്ന മദ്യക്കുപ്പി മാറ്റിവെച്ചായിരുന്നു പോള്‍ പോഗ്ബ വാര്‍ത്താസമ്മേളനത്തില്‍ ഇരുന്നത്. ഇസ്‌ലാം മത വിശ്വാസിയായ പോഗ്ബ മദ്യ ബ്രാന്‍ഡുകളുടെപരസ്യങ്ങളില്‍ അഭിനയിക്കാറില്ലെന്ന് തീരുമാനമെടുത്തിരുന്നു. ബീര്‍ തന്റെ വിശ്വാസത്തിന് എതിരായത് കൊണ്ടാണ് മാറ്റിവെച്ചതെന്ന് പോഗ്ബ വ്യക്തമാക്കുകയും ചെയ്തു.