കുമളി: അഞ്ചു വയസുകാരി ഉള്‍പ്പെടെ പ്രായപൂര്‍ത്തിയാകാത്ത രണ്ട് പെണ്‍കുട്ടികളെ ശാരീരികമായി പീഡിപ്പിച്ച യുവാവിനെ പൊലിസ് അറസ്റ്റ് ചെയ്തു.
ചക്കുപള്ളം ബാലകൃഷ്ണമെട്ട് കാമാക്ഷി വിലാസം അയ്യനാര്‍ (27) ആണ് അറസ്റ്റിലായത്. എല്‍.കെ.ജി വിദ്യാര്‍ഥിനിയും ബുദ്ധിമന്ദ്യമുള്ള പതിമൂന്നുകാരിയേയുമാണ് ഇയാള്‍ പീഡിപ്പിച്ചത്. കഴിഞ്ഞ വെള്ളിയാഴ്ച വൈകിട്ട് അഞ്ചു മണിയോടെ സ്‌കൂള്‍ വിട്ട് വന്ന കുട്ടികള്‍ ഷാംപു വാങ്ങി വീട്ടിലേക്ക് മടങ്ങുന്നതിനിടെയാണ് സംഭവം. ഞായറാഴ്ചയാണ് സംഭവം പുറത്തറിയുന്നത്.
അഞ്ചു വയസ്സുകാരിക്ക് ശാരീരികാസ്വസ്ഥതകള്‍ ഉണ്ടായതിനേത്തുടര്‍ന്ന്  മാതാവ് കാര്യം തിരക്കിയപ്പോഴാണ് പീഡന വിവരം പുറത്തറിയുന്നത്. കൂടുതല്‍ അന്വേഷിച്ചപ്പോഴാണ് ബന്ധു കൂടിയായ 13 കാരിയേക്കൂടി അയ്യനാര്‍ പീഡിപ്പിച്ചതായി  അറിയുന്നത്.  തുടര്‍ന്ന് ബന്ധുക്കള്‍ ഇരുവരേയും കുമളി പ്രാഥമികാരോഗ്യ കേന്ദ്രത്തില്‍ എത്തുകയായിരുന്നു. കുട്ടികള്‍ കട്ടപ്പന വനിതാ എസ് ഐ ജയശ്രീക്ക് മുമ്പാകെ മൊഴി നല്‍കി. വിവരം പുറത്തു പറഞ്ഞാല്‍ കൊല്ലുമെന്ന് ഭീഷണിപ്പെടുത്തിയതായും മൊഴിയിലുണ്ട്.  കുട്ടികളെ ഇന്ന് പാലായില്‍ എത്തിച്ച് വൈദ്യ പരിശോധനയ്ക്ക് വിധേയമാക്കും.