കോട്ടയം:  അഞ്ചു വര്‍ഷമായി പ്രവര്‍ത്തിപ്പിക്കാതിരുന്ന  ജില്ലാ  ആശുപത്രിയിലെ   സ്‌കാനിങ് മെഷീന്‍ ലീഗല്‍ സര്‍വീസ് അതോറിറ്റിയുടെ ഇടപെടലിനെത്തുടര്‍ന്ന് സജ്ജമാകാന്‍ വഴി തുറന്നു.
2011 ഡിസംബറിലാണ് സ്‌കാനിങ് മെഷീന്‍ കേന്ദ്ര ആരോഗ്യമന്ത്രാലയം ആശുപത്രിയ്ക്ക് അനുവദിച്ചത്. സാമ്പത്തികമായി പിന്നാക്കം നില്‍ക്കുന്നവരായ  ആയിരക്കണക്കിന് രോഗികള്‍ക്ക് ഗുണകരമാകുന്ന  സ്‌കാനിങ് മെഷീനാണ് വര്‍ഷങ്ങളായി ഉപയോഗിക്കാതെ പൊടി പിടിച്ച് കിടന്നത്.  
ആശുപത്രിയുടെ ഭരണതലപ്പത്ത് മാറി വന്നവര്‍  സാങ്കേതിക കാരണങ്ങളുടെ പേരിലാണ് സ്‌കാനിങ് മെഷീന്‍ പ്രവര്‍ത്തിപ്പിക്കുന്നത് നീട്ടിക്കൊണ്ടു പോയത്. കോട്ടയം ജില്ലാ ആശുപത്രിയായിരുന്നപ്പോള്‍ ജില്ലാ പഞ്ചായത്തിന്റെ നിയന്ത്രണത്തിലായിരുന്നു ഭരണം . ജില്ലാ പഞ്ചായത്ത് അധികൃതരും  മെഷീന്‍ പ്രവര്‍ത്തിപ്പിക്കുന്നതിനോട് ഉദാസീനമായ  നിലാപടാണ് സ്വീകരിച്ചത്.
ഇക്കാലയളവില്‍ ആശുപത്രിയില്‍ ചികില്‍സ തേടിയെത്തിയ സാധാരണക്കാരുള്‍പ്പെടെ രോഗനിര്‍ണയത്തിനായി  വന്‍തുക മുടക്കി സ്വകാര്യ സ്ഥാപനങ്ങളെ ആശ്രയിക്കേണ്ടി വരികയായിരുന്നു. ആശുപത്രിയ്ക്കു പരിസരത്തുള്ള സ്വകാര്യ സ്‌കാനിങ് സെന്ററുകള്‍ ഈ സാഹചര്യം മുതലെടുത്ത് കൊള്ളലാഭം നേടി. പാവപ്പെട്ട രോഗികള്‍ നേരിടുന്ന ബുദ്ധിമുട്ട് മനസിലാക്കിയ ആശുപത്രി സൂപ്രണ്ട് ഡോ. ബിന്ദുകുമാരിയുടെയം ലീഗല്‍ സര്‍വീസ് അതോറിറ്റിയിലെ പാരാ ലീഗല്‍ വാളണ്ടിയര്‍ ലത്തീഫ് മാനത്തുകാടന്റേയും ഇടപെടലാണ് സ്‌കാനിങ് മെഷീന്‍ പ്രവര്‍ത്തിപ്പിക്കാനുള്ള തീരുമാനത്തിലെത്തിച്ചത്.
വരുന്ന മാസം ആദ്യത്തോടെ സ്‌കാനിങ് മെഷീന്‍ പ്രവര്‍ത്തനസജ്ജമാവുമെന്നാണ് അറിയുന്നത്.