ജിൻഡാൽ സ്റ്റീൽ ആൻഡ് പവർ ചെയർമാൻ നവീൻ ജിൻഡാൽ ഇന്ത്യൻ സ്റ്റീൽ അസോസിയേഷൻ പ്രസിഡൻ്റായി ചുമതലയേറ്റു. മാർച്ച് 21 മുതൽ എഎംഎൻഎസ് ഇന്ത്യയുടെ ചീഫ് എക്സിക്യൂട്ടീവ് ഓഫീസർ (സിഇഒ) ദിലീപ് ഉമ്മൻ്റെ പിൻഗാമിയായി നവീൻ ജിൻഡാൽ പ്രസിഡൻ്റായി ചുമതലയേറ്റതായി ഇന്ത്യൻ സ്റ്റീൽ അസോസിയേഷൻ (ഐഎസ്എ) പ്രസ്താവനയിൽ അറിയിച്ചു.

ജിൻഡാൽ സ്റ്റീൽ ആൻഡ് പവർ (ജെഎസ്‌പി) ചെയർമാൻ നവീൻ ജിൻഡാലിനെ ഐഎസ്എയുടെ ഗവേണിംഗ് ബോഡിയായ അപെക്‌സ് കമ്മിറ്റി ഐഎസ്എയുടെ പ്രസിഡൻ്റായി ഐകകണ്‌ഠേന തിരഞ്ഞെടുത്തതായി പ്രസ്താവനയിൽ പറയുന്നു.

ഇന്ത്യയുടെ വികസന ലക്ഷ്യങ്ങൾ സാക്ഷാത്കരിക്കുന്നതിന് സ്റ്റീൽ വ്യവസായവും അതിൻ്റെ അപ്‌സ്ട്രീം, ഡൗൺസ്ട്രീം മാനുഫാക്ചറിംഗ് മൂല്യ ശൃംഖലകളും ഒരുമിച്ച് വളരേണ്ടതുണ്ട്. ലോകത്തോടുള്ള ഇന്ത്യയുടെ പ്രതിബദ്ധതയ്ക്ക് അനുസൃതമായുള്ള ലക്ഷ്യം കൈവരിക്കുന്നതിന് കാർബൺ ഫൂട്പ്രിന്റ് കുറയ്ക്കാനും കാർബണൈസ് ചെയ്യാനും വ്യവസായം പ്രതിജ്ഞാബദ്ധമാണ് - ജിൻഡാൽ പറഞ്ഞു.

സ്റ്റീൽ വ്യവസായത്തിലെ ലോകത്തിലെ തന്നെ പ്രമുഖ കേന്ദ്രമാണ് ഇന്ത്യ. വൻവ്യവാസായികൾ ഉൾപ്പെടെ നിരവധിപ്പേരാണ് സ്റ്റീൽ ബിസിനസ് മേഖലയിൽ പ്രവർത്തിക്കുന്നത്. ആഭ്യന്തര സ്റ്റീൽ വ്യവസായത്തിൻ്റെ പരമോന്നത സ്ഥാപനമാണ് ഐഎസ്എ അഥവാ ഇന്ത്യൻ സ്റ്റീൽ അസോസിയേഷൻ. ഈ മേഖലയിലെ പ്രശ്നങ്ങൾ ഉയർത്തിക്കാട്ടുന്നതിന് വ്യവസായികൾ കൂട്ടായി പ്രവർത്തിക്കുന്നു.