തിരുവനന്തപുരം: ഭരണഘടനാ വിരുദ്ധ പരാമര്‍ശം നടത്തിയതിനെ തുടര്‍ന്ന് രാജിവെച്ച സജി ചെറിയാനു പകരക്കാരന്‍ ആരെന്ന് ഇന്നറിയാം. ഇതടക്കം ഇന്ന് ചേരുന്ന സി.പി.എം സെക്രട്ടേറിയേറ്റ് യോഗത്തില്‍ ചര്‍ച്ചയാകും. മന്ത്രിസ്ഥാനം രാജിവച്ചെങ്കിലും ഭരണഘടനാ വിരുദ്ധ പരാമര്‍ശം ഇതുവരെ സജി ചെറിയാനോ പാര്‍ട്ടിയോ തള്ളി പറഞ്ഞിട്ടില്ല. അദ്ദേഹത്തിനെതിരെ എടുത്ത കേസും ചര്‍ച്ചയാകും.
തല്‍ക്കാലം സജി ചെറിയാന് പകരക്കാരനായി പുതിയ മന്ത്രി വേണ്ടെന്നാണ് സി.പി.എം ധാരണ. സജി ചെറിയാന് പൂര്‍ണ സംരക്ഷണം ഒരുക്കാനും സി.പി.എം ശ്രമിക്കും. കുറ്റമുക്തനായാല്‍ സജി ചെറിയാന്‍ മന്ത്രിസഭയിലേക്ക് തിരിച്ചെത്തുമെന്നും സൂചനയുണ്ട്.
ഇത്തരത്തില്‍ വീണ്ടും അവസരം നല്‍കണമെന്നത് ഉള്‍പ്പെടെയുള്ള അഭിപ്രായങ്ങള്‍ ഉയര്‍ന്നിരുന്നു. പക്ഷേ, കേസിന്റെ ഭാവി അടക്കം നോക്കിയാകും തീരുമാനം. എം.എല്‍.എ സ്ഥാനത്ത് നിന്നുള്ള രാജി പ്രതിപക്ഷം ആവശ്യപ്പെടുന്നുണ്ടെങ്കിലും പാര്‍ട്ടി ആവശ്യം തള്ളുകയാണ്. മുഖ്യമന്ത്രി ഏറ്റെടുത്ത സജി ചെറിയാന്റെ വകുപ്പുകള്‍ മറ്റേതെങ്കിലും മന്ത്രിക്ക് കൈമാറാനും സാധ്യതയുണ്ട്.