വിവാദങ്ങൾക്കിടെ മുഖ്യമന്ത്രിയും സംഘവും അമേരിക്കയിലേക്ക് പുറപ്പെട്ടു

തിരുവനന്തപുരം: സംസ്ഥാനത്ത് വിവാദങ്ങൾ ചൂടുപിടിച്ചിരിക്കെ ലോക കേരള സഭ മേഖലാ സമ്മേളനത്തിൽ പങ്കെടുക്കാൻ മുഖ്യമന്ത്രിയും സംഘവും അമേരിക്കയിലേക്ക് പുറപ്പെട്ടു. ധനമന്ത്രി കെ.എൻ.ബാലഗോപാൽ, സ്പീക്കർ എ.എൻ.ഷംസീർ എന്നിവരും മുഖ്യമന്ത്രിയെ അനുഗമിക്കുന്നുണ്ട്. ന്യൂയോർക്കിൽ ലോക കേരള സഭയുടെ അമേരിക്കൻ മേഖലാ സമ്മേളനം മറ്റന്നാൾ മുഖ്യമന്ത്രി ഉദ്ഘാടനം ചെയ്യും.

രാവിലെ 4.35നുള്ള എമിറേറ്റ്സ് വിമാനത്തിലാണ് തിരുവനന്തപുരത്ത് നിന്ന് ദുബായ് വഴി ന്യൂയോർക്കിലേക്ക് തിരിച്ചത്. ലോക കേരള സഭ സമ്മേളനത്തിന് ശേഷം 15, 16, തീയതികളിൽ മുഖ്യമന്ത്രി ക്യൂബയും സന്ദർശിക്കും.

അതേസമയം, വിദേശ യാത്ര ധൂർത്തെന്ന പ്രതിപക്ഷ വിമർശനത്തിനെതിരെ മന്ത്രി കെ.എൻ.ബാലഗോപാൽ രംഗത്ത് വന്നു. വിമർശനം രാഷ്ട്രീയ പ്രേരിതമെന്ന് മന്ത്രി ആരോപിച്ചു. സന്ദർശനം സംസ്ഥാനത്തിന് ഗുണം ചെയ്യുമെന്നും മന്ത്രി കൂട്ടിച്ചേർത്തു.