പ്രവാസികള്‍ക്ക് ഏറെ സന്തോഷകരമായ ഒരു വാര്‍ത്ത ഇപ്പോള്‍ പുറത്ത് വരുന്നുണ്ട്. യു.പി.ഐ ഉപയോഗിച്ച് കൊണ്ടുളള പണമിടപാട് ഇന്ത്യ കൂടുതല്‍ ഗള്‍ഫ് രാജ്യങ്ങളിലേക്ക് വ്യാപിപ്പിക്കാന്‍ ഒരുങ്ങുന്നു എന്നതാണത്. ബഹ്‌റൈന്‍,സഊദി അറേബ്യ എന്നീ രാജ്യങ്ങളിലേക്കാണ് യൂണിഫൈഡ് പേയ്‌മെന്റ് ഇന്റര്‍ഫേസ് ഉപയോഗിച്ചു കൊണ്ടുളള പണമിടപാടുകള്‍ ഇന്ത്യ നടപ്പിലാക്കാന്‍ ഉദ്ധേശിക്കുന്നത്. ഇത് സംബന്ധിച്ചുളള ചര്‍ച്ചകള്‍ തുടക്ക ഘട്ടത്തിലാണെന്നാണ് നാഷണല്‍ പേയ്‌മെന്റ് കോര്‍പ്പറേഷന്‍ ഓഫ് ഇന്ത്യ അറിയിച്ചിരിക്കുന്നത്.
മിന്റിന്റെ റിപ്പോര്‍ട്ട് പ്രകാരം അതിര്‍ത്തി കടന്നുളള ബാങ്ക് ടു ബാങ്ക് പണമിടപാടുകള്‍ക്കായി ഗള്‍ഫ് രാജ്യങ്ങളുമായി എന്‍.പി.സി.ഐ ചര്‍ച്ചകള്‍ നടത്തുന്നുണ്ട്.

ഈ വര്‍ഷം ആദ്യം യുപി ഐയും സിംഗപ്പൂർ ഡിജിറ്റല്‍ പേയ്‌മെന്റ് സംവിധാനമായ പേനൗവും തമ്മിലുള്ള സഹകരണത്തിന് തുടക്കമായിരുന്നു. 2021ല്‍ യുപിഐ സംവിധാനം സ്വീകരിക്കുന്ന ആദ്യ രാജ്യമായി ഭൂട്ടാന്‍ മാറിയപ്പോള്‍ 2022ല്‍ നേപ്പാളും പദ്ധതിയുടെ ഭാഗമായി. അന്താരാഷ്ട്ര മൊബൈല്‍ നമ്പറുകളുള്ള എന്‍ആര്‍ഇ/എന്‍ആര്‍ഒ പോലുള്ള നോണ്‍ റസിഡന്റ് അക്കൗണ്ട് യുപിഐ ഉപയോഗിച്ച് ഇടപാട് നടത്താന്‍ അനുവദിക്കുമെന്ന് ഈ വര്‍ഷം ജനുവരി ആദ്യം എന്‍പിസിഐ അറിയിച്ചിരുന്നു.

സിംഗപ്പൂര്‍, ഓസ്‌ട്രേലിയ, കാനഡ, ഹോങ്കോംഗ്, ഒമാന്‍, ഖത്തര്‍, യുണൈറ്റഡ് സ്റ്റേറ്റ്‌സ് ഓഫ് അമേരിക്ക, സൗദി അറേബ്യ, യുണൈറ്റഡ് അറബ് എമിറേറ്റ്‌സ്, യുണൈറ്റഡ് കിംഗ്ഡം എന്നീ 10 രാജ്യങ്ങളുടെ മൊബൈല്‍ നമ്പറുകളില്‍ നിന്നുള്ള ഇടപാടുകള്‍ ആരംഭിക്കാനുള്ള ശ്രമമാണ് ഇപ്പോള്‍ നടക്കുന്നത്. യുഎഇയുമായുള്ള ചര്‍ച്ചകളാണ് വലിയ തോതില്‍ പുരോഗമിച്ചിരിക്കുന്നത്. ചര്‍ച്ച എത്രയും വേഗത്തില്‍ പൂര്‍ത്തീകരിച്ചതിന് ശേഷം പദ്ധതിയുടെ പ്രഖ്യാപനവും ഉടനുണ്ടായേക്കും.

Content Highlights:upi transaction system is being extended to gulf countries