തേഞ്ഞിപ്പലം: ഇന്നലെ രാവിലെ ചേളാരി പാണമ്പ്രയില്‍ ബസുകള്‍ കൂട്ടിയിടിച്ചുണ്ടായ അപകടത്തെ തുടര്‍ന്നു ദേശീയപാതയില്‍ അനുഭവപ്പെട്ട ഗതാഗതക്കുരുക്ക് യാത്രക്കാരെ വലച്ചു. രാവിലെ ഒന്‍പതിന് തുടങ്ങിയ ഗതാഗത സ്തംഭനം മണിക്കൂറുകള്‍ നീണ്ടു. ഇത് ഓഫിസുകളിലേക്കും വിദ്യാഭ്യാസ സ്ഥാപനങ്ങളിലേക്കും പോകുന്ന വിദ്യാര്‍ഥികളടക്കമുള്ള യാത്രക്കാരെ ഏറെ പ്രയാസപ്പെടുത്തി.
പാണമ്പ്ര മുതല്‍ താഴെ ചേളാരി വരെയുള്ള രണ്ടു കിലോമീറ്റര്‍ ദൂരവും പാണമ്പ്ര മുതല്‍ സര്‍വകലാശാലാ ബസ് സ്റ്റോപ്പ് വരെയും വാഹനങ്ങളുടെ നീണ്ട നിര കാണാമായിരുന്നു. മാതാപുഴ റോഡിലും ഗതാഗതക്കുരുക്കനുഭവപ്പെട്ടു. ചേളാരിയിലെ ചന്തയ്‌ക്കെത്തിയവരും കുരുക്കില്‍പെട്ടു വലഞ്ഞു.