എടപ്പാള്‍: കോലളമ്പ് നിക്ഷേപത്തട്ടിപ്പ് കേസില്‍ പണം നഷ്ടപ്പെട്ടവരുടെ നേതൃത്വത്തില്‍ പൗരസമിതി രൂപീകരിച്ചു. കോലൊളമ്പില്‍ ചേര്‍ന്ന യോഗമാണ് പൗരസമിതി രൂപീകരിക്കാന്‍ തീരുമാനിച്ചത്. വര്‍ഷങ്ങള്‍ കഴിഞ്ഞിട്ടും നഷ്ടപെട്ട പണം തിരികെ ലഭിക്കുകയോ കുറ്റവാളികള്‍ ശിക്ഷിക്കപെടുകയോ ചെയ്യാത്തതിനെ തുടര്‍ന്നാണ് യോഗം ചേര്‍ന്നത്.
ഒരുലക്ഷം മുതല്‍ മൂന്ന് കോടി രൂപവരെ നഷ്ടപ്പെട്ടവരാണ് യോഗത്തില്‍ പങ്കെടുത്തത്. സംഭവത്തിലുള്‍പ്പെട്ടവരുടെ വീട്ടുപേര് മാത്രം പരിശോധിച്ചാണ് അന്വേഷണ ഉദ്യോഗസ്ഥര്‍ സ്വത്തുക്കള്‍ കണ്ടണ്ടുകെട്ടിയിട്ടുള്ളതെന്നും പ്രതികളുടെ  സ്വത്തുക്കളില്‍ അധികവും ബിനാമി പേരുകളിലായതിനാല്‍  അതൊന്നും ഇതുവരെ കണ്ടണ്ടുകെട്ടിയിട്ടില്ലെന്നും യോഗത്തില്‍  ആരോപണമുയര്‍ന്നു. നീതി ലഭിക്കുന്നതിനായി മുഖ്യമന്ത്രിയുള്‍പ്പെടെയുള്ളവരെ കാണാനും വിഷയമുന്നയിച്ചു സമരരംഗത്തിറങ്ങാനും യോഗം തീരുമാനിച്ചു. കൂടുതല്‍ നിക്ഷേപകരെ പങ്കെടുപ്പിച്ച് കണ്‍വെന്‍ഷന്‍ നടത്താനും തീരുമാനമായി.