രാഹുൽ ഗാന്ധിക്കൊപ്പം അണിനിരന്ന് കോൺഗ്രസ്; ഇന്ന് രാജ്യവ്യാപകമായി 'മൗനസത്യ​ഗ്രഹം' ആചരിക്കും

തിരുവനന്തപുരം: കേന്ദ്രസർക്കാർ കോൺഗ്രസ് നേതാവ് രാഹുൽ ഗാന്ധിക്കെതിരെ നടത്തുന്ന നടപടികളിൽ പ്രത്യക്ഷ സമരവുമായി കോൺഗ്രസ്. രാഹുൽ ഗാന്ധിക്ക് പിന്തുണയുമായി കോൺ​ഗ്രസ് ഇന്ന് രാജ്യവ്യാപകമായി 'മൗനസത്യ​ഗ്രഹം' ആചരിക്കും. കേരളത്തിലെ മൗനസത്യഗ്രഹം തിരുവനന്തപുരത്ത് നടക്കും.

രാഹുൽ ഗാന്ധിയെ എം.പി സ്ഥാനത്ത് നിന്ന് അയോഗ്യനാക്കിയ നടപടി ​ഗുജറാത്ത് ഹൈക്കോടതി സ്റ്റേ ചെയ്യാത്ത പശ്ചാത്തലത്തിലാണ് വ്യത്യസ്തമായ സമരമുറയ്‌ക്ക് എഐസിസി ആഹ്വാനം ചെയ്തത്. എല്ലാ സംസ്ഥാനങ്ങളിലും സമരം നടക്കും.

തിരുവനന്തപുരത്ത് ​ഗാന്ധി പാർക്കിലെ ​ഗാന്ധി പ്രതിമയ്‌ക്ക് മുന്നിലാണ് സമരം നടക്കുക. രാവിലെ പത്ത് മണി മുതൽ സമരം ആരംഭിക്കും. ബ്ലോക്ക് തലം മുതൽ കെപിസിസി തലം വരെയുള്ള നേതാക്കൾ സമരത്തിൽ അണിചേരും. തിരുവനന്തപുരത്തിന് പുറമെ സംസ്ഥാനത്തിന്റെ വിവിവിധയിടങ്ങളിൽ പ്രാദേശികമായും മൗനസത്യ​ഗ്രഹം നടക്കുന്നുണ്ട്.

അതേസമയം, കനത്തമഴ നാശം വിതക്കുന്ന ഡൽഹി, ഹരിയാന, പഞ്ചാബ്, ഹിമാചൽ പ്രദേശ് എന്നിവിടങ്ങളിലെ സമര പരിപാടി മാറ്റിയിട്ടുണ്ട്. ഇവിടങ്ങളിൽ മൗനസത്യാ​ഗ്രഹം ജൂലൈ 16 ന് നടക്കുമെന്ന് കെ.സി വേണു​ഗോപാൽ അറിയിച്ചു.