ഫുട്ബാളിൽ വീണ്ടും സഊദിയുടെ കുതിപ്പ്; ആഫ്രിക്കൻ സൂപ്പർ കപ്പിന് വേദിയാകും

റിയാദ്: ആഫ്രിക്കൻ സൂപ്പർ കപ്പിന് സഊദി അറേബ്യ വേദിയാകും. ടോട്ടൽ എനർജീസ് സി.എ.എഫ് സൂപ്പർ കപ്പ് 2023 സെപ്റ്റംബർ 15 ന് നടക്കുമെന്ന് കോൺഫെഡറേഷൻ ഓഫ് ആഫ്രിക്കൻ ഫുട്ബോളും സഊദി അറേബ്യൻ ഫുട്ബോൾ ഫെഡറേഷനും അറിയിച്ചു.

തായിഫിലെ കിംഗ് ഫഹദ് സ്റ്റേഡിയത്തിൽ നടക്കുന്ന മത്സരത്തിൽ സി.എ.എഫ് ചാമ്പ്യൻസ് ലീഗ് ചാമ്പ്യൻമാരായ അൽ അഹ്‌ലി എസ്‌.സിയും സി.എ.എഫ് കോൺഫെഡറേഷൻ കപ്പ് ചാമ്പ്യൻമാരായ അൾജീരിയയുടെ യൂണിയൻ സ്‌പോർട്ടീവ് ഡി ലാ മെഡിന ഡി അൽജറും തമ്മിലാണ് മത്സരം.

ആഗോള ഫുട്ബോളിൽ വലിയ മുന്നേറ്റങ്ങൾ നടത്തുന്ന സഊദി അറേബ്യയിലെ ഒരു പുതിയ പ്രദേശത്തേക്ക് ടോട്ടൽ എനർജീസ് സി.എ.എഫ് സൂപ്പർ കപ്പ് കൊണ്ടുപോകുന്നതിൽ ഞങ്ങൾ ആവേശഭരിതരാണെന്ന് സി.എ.എഫ് ജനറൽ സെക്രട്ടറി വെറോൺ മൊസെൻഗോ-ഓംബ പറഞ്ഞു.

1993-ൽ ആദ്യമായി അരങ്ങേറിയ സൂപ്പർ കപ്പിൽ അൽ അഹ്‌ലി ഇതുവരെ എട്ട് തവണ മുത്തമിട്ടിട്ടുണ്ട്. ഈജിപ്ത് അംഗമായ സമലേക് (നാല് കിരീടങ്ങൾ), ഡെമോക്രാറ്റിക് റിപ്പബ്ലിക് ഓഫ് കോംഗോയിൽ നിന്നുള്ള ടിപി മസെംബെ (മൂന്ന്) എന്നിവരാണ് കൂടുതൽ തവണ കിരീടം നേടിയ മറ്റു ടീമുകൾ.

നാല് തവണ ആതിഥേയരായ ഖത്തറിന് ശേഷം സൂപ്പർ കപ്പ് മത്സരത്തിന് ആതിഥേയത്വം വഹിക്കുന്ന രണ്ടാമത്തെ മിഡിൽ ഈസ്റ്റ് രാജ്യമാണ് സഊദി അറേബ്യ.