മംഗലൂരു: കര്‍ണാടകയില്‍ വിദ്യാര്‍ത്ഥികളായ ആണ്‍കുട്ടിയും പെണ്‍കുട്ടിയും ചുംബിക്കുന്നതിന്റെ വിഡിയോ വൈറലായതിനു പിന്നാലെ എട്ടു പേരെ പൊലിസ് കസ്റ്റഡിയിലെടുത്തു. സ്വകാര്യ ഫ്‌ളാറ്റില്‍ വെച്ചാണ് സ്‌കൂള്‍ യൂനിഫോം ധരിച്ച വിദ്യാര്‍ത്ഥികള്‍ ചുംബിക്കുന്നത്.

സുഹൃത്തുക്കള്‍ അവരെ പ്രോത്സാഹിപ്പിക്കുന്നതും വിഡിയോയില്‍ കാണാം. വിദ്യാര്‍ത്ഥികള്‍ ചേര്‍ന്ന് സംഘടിപ്പിച്ച ചുംബന മത്സരത്തില്‍ പങ്കെടുക്കാനെത്തിയതാണ് ഇരുവരുമെന്ന് പൊലിസ് പറഞ്ഞു. ദൃശ്യങ്ങള്‍ വിഡിയോയില്‍ ചിത്രീകരിച്ച വിദ്യാര്‍ത്ഥിയെയാണ് ചോദ്യം ചെയ്യാനായി പൊലിസ് ആദ്യം കസ്റ്റഡിയിലെടുത്തത്.

ആറു മാസം മുമ്പ് സ്വകാര്യ ഫ്‌ളാറ്റില്‍ നടന്ന സംഭവത്തിന്റെ ദൃശ്യങ്ങള്‍ അടുത്തിടെയാണ് പുറത്തറിഞ്ഞത്. ഒരാഴ്ച മുമ്പ് വിദ്യാര്‍ത്ഥികളിലൊരാള്‍ വിഡിയോ വാട്‌സ് ആപില്‍ പങ്കുവെക്കുകയും പിന്നീടത് വൈറലാവുകയുമായിരുന്നു. തുടര്‍ന്ന് സ്‌കൂള്‍ അധികൃതര്‍ വിദ്യാര്‍ത്ഥികളെ പുറത്താക്കിയിരുന്നു. സംഭവത്തില്‍ ആരും പരാതി നല്‍കിയിട്ടില്ല.