ദുബൈ:കേന്ദ്രവിദേശകാര്യമന്ത്രി ഡോ. എസ്. ജയശങ്കര്‍ ഇന്ന് (ബുധനാഴ്ച) യു.എ.ഇയിലെത്തും. ത്രിദിന സന്ദര്‍ശനത്തിനാണ് മന്ത്രി എത്തുന്നത്. ഇരു രാജ്യങ്ങളും തമ്മില്‍ സഹകരണത്തിന്റെ വിവിധ തലങ്ങള്‍ ചര്‍ച്ചയാകും. യു.എ.ഇവിദേശകാര്യ, അന്താരാഷ്ട്ര സഹകരണ മന്ത്രി ശൈഖ് അബ്ദുല്ല ബിന്‍ സായിദ് ആല്‍ നഹ്‌യാനുമായും മന്ത്രി ജയശങ്കര്‍ കൂടിക്കാഴ്ച നടത്തും. 14ാമത്ഇന്ത്യ-യു.എ.ഇ സംയുക്തകമ്മിഷന്‍ യോഗത്തിലും മൂന്നാമത് സ്ട്രാറ്റജിക് ഡയലോഗിലും പങ്കെടുക്കുന്നതിനാണ് മന്ത്രി ഡോ. എസ് ജയശങ്കര്‍ എത്തുന്നത്. കഴിഞ്ഞ ഫെബ്രുവരിയില്‍ സമഗ്ര സാമ്പത്തിക സഹകരണ കരാരില്‍ ഇരു രാജ്യങ്ങളും ഒപ്പുവെച്ചിരുന്നു. അഞ്ചു വര്‍ഷംകൊണ്ട് ഇരു രാജ്യങ്ങളുടെയും ഉഭയകക്ഷി വ്യാപാരം 6,000കോടി ഡോളറില്‍നിന്ന് 10,000 കോടി ഡോളറായി ഉയര്‍ത്തുകയാണ് ലക്ഷ്യം. സമഗ്രസാമ്പത്തിക കരാറിന്റെ ഇതുവരെയുള്ള പുരോഗതി വിലയിരുത്തുമെന്ന് കേന്ദ്ര വിദേശകാര്യ മന്ത്രാലയം പ്രസ്താവനയില്‍അറിയിച്ചു. ഇന്ത്യയുടെ മൂന്നാമത്തെ വലിയ വ്യാപാര പങ്കാളിയാണ് യു.എ.ഇ.