തിരുവനന്തപുരം • തെരുവുനായ വന്ധ്യംകരണ പദ്ധതി എല്ലാ ജില്ലകളിലേക്കും വ്യാപിപ്പിക്കുമെന്ന് മന്ത്രിമാരായ എം.വി ഗോവിന്ദനും ജെ.ചിഞ്ചുറാണിയും പറഞ്ഞു.
മൃഗസംരക്ഷണ വകുപ്പിന്റെ കീഴിൽ നിലവിലുള്ള എ.ബി.സി സെന്ററുകളുടെ അടിസ്ഥാന സൗകര്യം മെച്ചപ്പെടുത്തും.
സർക്കാരിന് നേരിട്ട് എ.ബി.സി പദ്ധതി നടപ്പാക്കാൻ അനിമൽ വെൽഫെയർ ബോർഡിന്റെ അനുമതി ആവശ്യമില്ല. ഇതിനാവശ്യമായ തുക തദ്ദേശ സ്വയംഭരണ സ്ഥാപനങ്ങൾ പദ്ധതി വിഹിതത്തിൽ വകയിരുത്തണം.
ജില്ലാ, ബ്ലോക്ക് പഞ്ചായത്തുകൾ ജില്ലയിലുള്ള എ.ബി.സി കേന്ദ്രങ്ങളുടെ അടിസ്ഥാന സൗകര്യം മെച്ചപ്പെടുത്താൻ തുക വകയിരുത്തണം.
വെറ്ററിനറി ഡോക്ടർമാർ, ഡോഗ് കാച്ചർമാർ, മൃഗപരിപാലകർ എന്നിവരെ മൃഗസംരക്ഷണ വകുപ്പ് എംപാനൽ ചെയ്യും.
ഓരോ എ.ബി.സി യൂനിറ്റിന്റേയും പരിധിയിൽ വരുന്ന ഗ്രാമപഞ്ചായത്തുകൾ മുൻസിപ്പാലിറ്റികൾ എന്നിവ തങ്ങളുടെ പ്രദേശത്തെ തെരുവുനായ്ക്കളുടെ എണ്ണത്തിനനുസരിച്ചുള്ള തുക പദ്ധതിയിൽ ഉൾപ്പെടുത്തി പ്രോജക്ട് സമർപ്പിക്കണം.
സംസ്ഥാനത്ത് 30 എ.ബി.സി സെന്ററുകൾ പ്രവർത്തിപ്പിക്കാൻ നടപടികൾ ആരംഭിച്ചിട്ടുണ്ട്. 340 തദ്ദേശസ്വയംഭരണ സ്ഥാപനങ്ങൾ എ.ബി.സി ചെയ്യാൻ ആറ് കോടി രൂപ മാറ്റിവച്ചിട്ടുണ്ട്. പേവിഷബാധ നിർമാർജനത്തിന് സന്നദ്ധ സംഘടനകൾ, റസിഡൻസ് അസോസിയേഷനുകൾ എന്നിവയുമായി ചേർന്ന് സ്‌കൂളുകളിലടക്കം ബോധവൽക്കരണ പരിപാടി സംഘടിപ്പിക്കും.
മൃഗസംരക്ഷണ വകുപ്പിന്റെ കൈവശമുള്ള ആറ് ലക്ഷം വാക്‌സിനിൽ അഞ്ച് ലക്ഷവും മൃഗാശുപത്രികൾക്ക് കൈമാറിയിട്ടുണ്ട്. ഇനിയും ആവശ്യമുള്ള നാല് ലക്ഷം വാക്‌സിനുകൾ വാങ്ങി വിതരണം ചെയ്യാൻ നടപടിയാരംഭിച്ചതായും മന്ത്രിമാർ പറഞ്ഞു.