ന്യൂഡല്‍ഹി: ഡല്‍ഹി സര്‍ക്കാരിന്റെ ലോ ഫ്‌ളോര്‍ ബസ് ഇടപാടില്‍ സി.ബി.ഐ അന്വേഷണത്തിന് അനുമതി. ഡല്‍ഹി ലെഫ്. ഗവര്‍ണര്‍ വികെ സക്‌സേനയാണ് അന്വേഷണത്തിന് അനുമതി നല്‍കിയത്.

ഡല്‍ഹിയിലെ ആം ആദ്മി സര്‍ക്കാര്‍ 1000 ലോ ഫ്‌ളോര്‍ ബസുകള്‍ വാങ്ങിയതില്‍ അഴിമതി ആരോപിച്ച് നേരത്തെ ബിജെപി രംഗത്തെത്തിയിരുന്നു. ഇതിന് പിന്നാലെയാണ് നടപടി. 2021 ആഗസ്റ്റ് 16ന് 1000 ലോ ഫ്‌ളോര്‍ ബസുകള്‍ വാങ്ങിയതില്‍ അഴിമതിയുണ്ടെനന്നായിരുന്നു ബി.ജെ.പിയുടെ പരാതി.

ഡല്‍ഹി സര്‍ക്കാരിന്റെ വകുപ്പുകളില്‍ നിന്ന് അഭിപ്രായം തേടാനും അതിന്റെ ഫലമായി അവരുടെ ശുപാര്‍ശകള്‍ തേടാനും ജൂലൈ 22 ന് പരാതി ചീഫ് സെക്രട്ടറിക്ക് കൈമാറി.
ഓഗസ്റ്റ് 19 ന് ചീഫ് സെക്രട്ടറി സമര്‍പ്പിച്ച റിപ്പോര്‍ട്ടില്‍ ചില ക്രമക്കേടുകള്‍ ചൂണ്ടിക്കാണിച്ചിരുന്നു, ഇതിനെ തുടര്‍ന്നാണ് സക്‌സേന ഇപ്പോള്‍ സിബിഐക്ക് അന്വേഷണത്തിന് അനുമതി നല്‍കിയത്.

ഇക്കാര്യം അന്വേഷിക്കണമെന്ന് കേന്ദ്ര ആഭ്യന്തര മന്ത്രാലയവും ആവശ്യപ്പെട്ടിരുന്നു. ഡല്‍ഹി മുന്‍ എല്‍ജി അനില്‍ ബൈജല്‍ ഇക്കാര്യം പരിശോധിക്കാന്‍ മൂന്നംഗ സമിതി രൂപീകരിക്കാന്‍ ഉത്തരവിടുകയും ചെയ്തിരുന്നു.