പാസ്പോർട്ട് വെരിഫിക്കേഷന് 1000 രൂപ കൈക്കൂലി; പൊലിസുകാരൻ പിടിയിൽ

കണ്ണൂര്‍: പാസ്പോർട്ട് വെരിഫിക്കേഷൻ നടത്താൻ കൈക്കൂലി വാങ്ങിയ പൊലിസുകാരൻ വിജിലന്‍സ് പിടിയിൽ. കണ്ണൂർ ചക്കരക്കല്‍ സ്റ്റേഷനിലെ സിവില്‍ പൊലിസ് ഓഫീസര്‍ ഉമര്‍ ഫറൂഖാണ് വിജിലൻസിന്റെ പിടിയിലായത്. ചക്കരക്കല്‍ സ്വദേശിയായ യുവാവില്‍ നിന്നാണ് ഇയാൾ കൈക്കൂലി വാങ്ങിയത്.

പാസ്‌പോര്‍ട്ട് വെരിഫിക്കേഷന്‍ നടത്താന്‍ ആയിരം രൂപ ഇയാൾ കൈക്കൂലി ആവശ്യപ്പെടുകയായിരുന്നു. തുടർന്ന് യുവാവ് നൽകിയ വിവരത്തിന്റെ അടിസ്ഥാനത്തിൽ ഉമർ ഫാറൂഖിനെ വിജിലൻസ് പിടികൂടുകയായിരുന്നു. കണ്ണൂര്‍ വിജിലന്‍സ് യൂണിറ്റ് ഡെപ്യൂട്ടി പൊലിസ് സൂപ്രണ്ട് ബാബു പെരിങ്ങോത്തിന്റെ നേതൃത്വത്തിലുള്ള സംഘമാണ് ഇയാളെ പിടികൂടിയത്.

വിജിലന്‍സ് സംഘത്തില്‍ ഇന്‍സ്‌പെക്ടര്‍മാരായ അജിത് കുമാര്‍, വിനോദ്, പി.ആര്‍ മനോജ്, സബ് ഇന്‍സ്‌പെക്ടര്‍ ഗിരീഷ്, അസിസ്റ്റന്റ് സബ് ഇന്‍സ്‌പെക്ടര്‍മാരായ രാധാകൃഷ്ണന്‍, പ്രവീണ്‍, ബാബു, നിജേഷ്, സി.പി.ഒ സുകേഷ് എന്നിവരുമുണ്ടായിരുന്നു.